UZIBONA enesikweletu esimhlalele umdlali weSuperSport United, George Lebese, ofike kuleli qembu ngoJanuwari.
ULebese ubolekwe ngaMatsatsantsa a Pitori kuze kuphele isizini komakhelwane bawo, iMamelodi Sundowns abelizwa ngendaba ijezi kubona.
Lo mdlali ufike kumaBrazilians ngesizini ka-2017/22018 esuka kwiKaizer Chiefs ayeshiye kuyona ekhala ngokungasitholi isikimu ngaphansi kukaSteve Komphela. Nokho izinto azimhambelanga kahle eChloorkop, kuthiwa kumele ehlise umzimba ukuze abuyele esimeni esifanele ukudlala.
Ekhuluma nabezindaba ngaphambi komdlalo we-United ne-Orlando Pirates onamuhla, uLebese uveze ukuthi ujabule kuMatsatsantsa. Umdlalo useMbombela Stadium ngo-7.30 ebusuku.
“Kumele ngenze konke ngisebenze ngokuzikhandla ukukhokhela ukwethembeka usihlalo neqembu abakukhombise kimina. Engikuhlosile wukusiza iqembu ekutholeni amaphuzu,” kusho uLebese.
Amaphuzu iyawadinga impela i-United elwela ukuqeda kwiTop 4 kule sizini ngokusho kukazakwabo kaLebese, uReneilwe Letsholonyane. Ngesizini edlule bangene ngemizuzu yokugcina kumaqembu ayisishiyagalombili aphezulu kwi-Absa Premiership.
ULebese uthe bayilungele iPirates yize bekuqonda ukuthi idlala ibhola eliphezulu kulezi zinsuku.
“Siyayiqonda indlela abahlasela ngayo. Bayingozi futhi bayawashaya amagoli. Okwethu wukuthi sizame ukukuvimba lokho bese silwela ukuthi nathi sishaye amagoli ngakubona, sinqobe umdlalo ukuze sithole amaphuzu,” kusho uLebese.
Uthe kusukela efikile eqenjini elisha zonke izinto zihamba kahle ngemuva kokukhathazeka ngesikhathi kungacaci ukuthi kuzokwenzakalani ngaye ngoJanuwari kuvulwe iwindi.
“Ngangingenalo ulwazi (ngokuthi uzosayina kwi-United) kwaze kwaba wusuku lokugcina okwakungikhathaza futhi anginalo ulwazi ukuthi kungani kwathatha isikhathi eside ukuthi kwenzeke (ukusayina). Ngosuku lokugcina ngathola ucingo kwimenenja yami lungazisa ngokuthi kukhona iqembu elingase lingisayine. Ngazizwa ngikhululekile ngesikhathi sengihamba,” kusho uLebese.
Ebuzwa ukuthi uzobuyela yini kwiSundowns uma sekuphele isivumelwano sokubelekiswa ngoMeyi, uthe: “Angazi. Ngeke ngikwazi ukuphendula lokho."