IMENENJA yesikhwishikhwishi seFree State Stars uSinethemba Jantjie ithi inovalo lokuthi umdlali wayo kungenzeka ahlukumezeke kwiStars uma izingxoxo neBidvest Wits zingaphothulwa maduzane.
IWits isanda kuqinisekisa ukuthi uJantjie usayine inkontileka yesibambiso nayo, okusho ukuthi kuzothi uma kuphela isizini ajoyine iZitshudeni. Nokho uGavin Hunt kuthiwa akasayizwa eyokuthi ahlale eBethlehem kuze kuphele isizini, yingakho ephushela ukuthi uJantjie asayine kwezakhe ewindini likaJanuwari.
Ngokwemibiko, uJantie usayine inkontileka yeminyaka emine, nesivumelwano sokuvuselela ngaphezulu.
Namuhla iWits neStars izoxoxa ngaye, nalapho kulindeleke ukuthi ivumelane ngekusasa lakhe ekutheni ngabe uyayijoyina yini iWits manje ngoJanuwari noma uzoya kuyo uma kuphela isizini. UHunt uqhwakele nezakhe kwi-log ye-Absa Premiership ngamaphuzu awu-33, emidlalweni ewu-16.
Kungayisiza nokho iStars ukuthi isheshe imdayise uJantjie ukuze ithole imali. Ngesizini edlule ngalesi sikhathi, iStars yalahlekelwa nguNhlanhla Vilakazi, naye owasayina inkontileka yesibambiso naMaZulu FC, agcine ewajoyine bhusende.
Imenenja kaJantjie, uRatshibvumo Mulovhedzi weRush Hour Sport Management, uthe umincile ukuthi konke kuhambe kahle ngoba akafuni nakancane umdlali wakhe ahlukumezeke.
“IWits neStars banobudlelwano obuhle uma kuziwa kubadlali. Kusasa (esho namuhla), bazohlangana babhunge ngekusasa likaJantjie. Iqiniso wukuthi konke kulele kwiStars ngoba usenenkontileka nayo umdlali ezophela ngoJuni. Ngiyafisa nje ukuthi konke kuhambe kahle ngoba umdlali usekubeke kwacaca ukuthi ukuthi ufuna ukuhamba, uyazi ukuthi uHunt ufuna ukumsebenzisa. Okungimincisayo wukuthi uma kungalungi kulolu daba, uzohlukunyezwa angaphinde adlale kwiStars, yilokho nje engikwesabayo,” usho kanje uMulovhedzi.
UJantjie ufike kwiStars evela kwiMbombela United edlala kwiNational First Division (NFD) ngo-2016. Amanye amaqembu okuvela ukuthi abemfuna uthuli yiMamelodi Sundowns, Kaizer Chiefs ne-Orlando Pirates.