ULUVUYO “Baracks” Ncandana owayengukaputeni kuMthatha Bush Bucks nosengumhlaziyi kanobhutshuzwayo kwiSouth African Broadicasting Corporation ukholwa wukuthi ukusayina kuka-Leonardo Castro kwiKaizer Chiefs kungaba yikhubalo elingelapha uzozo, obesekunesikhathi eside uhlupha abaphathi nabaqeqeshi bayo ngokuba buthuntu kwabagadli phambi kwamapali kusukela amasizini amathathu.
Ukusayina kukaCastro eNaturena kuqinisekiswe izolo uVina Maphosa osophikweni lwezokuxhumana kwiChiefs.
UNcandana uthe abaphathi beChiefs bebevele besephutheni ekutheni bathembele kubadlali ababodwa abafana noBernard Parker noSiphiwe Tshabalala ekubeni sebedlale amasizini ayishumi.
“Ngicabanga ukuthi bayihlabe esikhonkosini ngokusayinisa uCastro. Akekho ongamazi ukuthi ungumgadli osezingeni eliphezulu. Inkinga angabhekana nayo njengamanje wukuthi ubengasadlali njalo kwiSundowns okungenzeka ukuthi akasekho ezingeni ebesimazi ekulona nokuthi uzokwazi yini ukusheshe azinze kwiqembu lakhe elisha,”kusho uNcandana.
Uqhuba uthi ngesitayela esidlalwe yiChiefs kungenzeka ukuthi asheshe awubambe umgqigqo abuyele ezingeni lakhe aziwa ngalo.
“Nakuba kade engasadlali mhlawumbe ukungadlali kwakhe bekwenziwa yimixhantela eminingi esingayazi. Kungenzeka ukuthi ukushiya kwakhe kwiSundowns nokudlala kwiqembu elisha kuzomenza agqugquzeleke abuyelwe ukuzethemba okuzomenza aqhubeke kalula nezinga aziwa ngalo,” kubeka uNcandana.
Lo mdlali odabuka eColombia ngo-Agasti kuke kwaba nokwesaba ukuthi kungenzeka angabuyeli eChloorkop njengoba afika ngemizuzu yokugcina sekuzovalwa ushwele wokudayiselana ngabadlali.
Ngalesikhathi wayekade evakashele kwelakubo ngoba umkakhe ayelindele ukuthola umntwana.
Kwakufanele abuye ukuze iqembu likwazi ukuvuselela isivumelwano naye.
UCastro uzokuba ngumdlali wesibili odabuka eSouth America, ukushiya iSundowns ayodlalela iChiefs. Ngaphambili kwakhe kwaba nguJose Torealba waseVenezuela, owashiya kwiSundowns ngaphansi kwefu elimnyama ngemuva kombango wokuthi kwakukokotelwe indlela asayinda ngayo.
Okunye okungenza asheshe ajwayele kwiChiefs ukufica umkhaya wakhe uGustavo Paez abadabyuka naye eSouth America.
UCastro ufike kwiMamelodi Sundowns wahlangana kahle noKhama Billiat, Keegan Dolly phambili.
Lo mdlali usekhonjwa eNaturena nje Isolezwe ngoMgqibelo labika ngo-Okthoba 21 ukuthi iChefs isiqede konke noCastro, kodwa izinhlangothi zombili zaphika zalala ngomhlane.