KUBONAKALA sengathi uPercy Tau uzofika esefomini enhle engasiza iBafana Bafana njengoba elokhu eqhubeke njalo nokuzifaka ezinhliziyweni zabalandeli beqembu lakhe laseBelgium i-Union Saint Gilloise egijima kwiFirst Division.
UTau useshaye amagoli imidlalo ilandelana njengoba ngoLwesibili esize ezakhe zinqoba emdlalweni weligi zishaya iBeerschot-Wilrijk ngo 2-0.
Ushaye igoli lesibili kulo mdlalo. Lilandele alivalele ngempelasonto benqoba ngo 3-2.
Lo mgadli weBafana useshaye amagoli amathathu emidlalweni yeligi nelilodwa kowomkhumulajezi kusukela efike eBelgium. UTau ufike kwiSaint Gilloise ekuqaleni kwesizini ngemuva kokubolekiswa iBrighton & Hove Albion edlala kwi-English Premiership. Leli qembu lase-England limthenge kwiMamelodi Sundowns, lase limdlulisela eBelgium ngenhloso yokuthatha amandla, ajwayele isitayela sase-Europe. Okunye kube wukungenzi kahle kweBafana engaphansi kuka-50 ngokukleliswa iFifa.
Kuzobobhekwa ukuthi uTau aqhubeke nokubhakuzisa inethi noma esedlubhe imibala yeBafana ezothuthana neNigeria ngoNovemba 17. La maqembu azobe eqhuthana emdlalweni wokuhlungela i-Africa Cup of Nations (Afcon) eFNB Stadium.
IBafana idinga ukuwunqoba lo mdlalo ukuze izibeke ethubeni elihle lokuya kwi-Afcon eCameroon ngonyaka ozayo.
Okwamanje iyibambe endaweni yesibili kuGroup F ngamaphuzu ayisishiyagalombili. ISuper Eagles iqhwakele ngamaphuzu ayisishiyagalolunye.
Endaweni yesithathu kuhleli iLibya ngamahlanu bese kuvala iSeychelles ngelilodwa elithole ibambana neBafana ngo 0-0 ngo-Okthoba. ILibya izodlala neSeychelles ngoNovemba 16.
Isikwati seNigeria esizobhekana neBafana sizobe siholwa u-Odion Ighalo oqhulule amagoli amahlanu emidlalweni emibili bebhekene neLibya ngo-Okthoba.