IYEKE ithuba lokuqhwakela iMamelodi Sundowns ibanjelwa ekhaya yiPolokwane City kulo mdlalo we-Absa Premiership ophele ngo 1-1 eLoftus Versfeld izolo ebusuku.
ISundowns ibidinga ukunqoba ngamagoli amabili ukuze igudluze iBidvsest Wits esicongweni seligi. Lo mphumela ususho ukuthi amaBrazilians sekumele ashaye Izitshudeni lapho esedlala nazo ngoMgqibelo eBidvest Stadium.
ISundowns esele emuva ngemidlalo, iyawadinga la maphuzu kwazise kungenzeka izithole iphucwa amaphuzu uma ilahlwa yicala lokudlalisa uWayne Arendse kungafanele. Lokho yakwenza ibhekene nayo iWits emzuliswaneni wokuqala weligi owaphela zibambene.
Icala leSundowns lingenile ngoLwesine olwedlule, uma liyilahla kungenzeka iWits izithole ihlomula ngamaphuzu amathathu angenza umehluko omkhulu embangweni weligi. Elinye iqembu elisembangweni wesicoco yi-Orlando Pirates edlala neSuperSport United namuhla, okufanele ukuthi iwujabulele umphumela wayizolo.
Igoli leDowns lishaywe nguThemba Zwane emizuzwini eyishumi kuqale umdlalo. Ngemuva kwalokho ibe nazo ezinye izikhawu ezimbalwa ebingandisa ngazo amagoli ayo. ICity ihlomule ngegoli lokuphiwa ngemuva kokuthi uDenis Onyango enze inkunzimalanga yephutha ededela ibhola ebelingqofwe ngekhanda uSalulani Phiri.
Lo nozinti osanda kuzishaya isifuba ngokuthi ungohamba phambili kuleli umane wahluleka nokuzibamba waphihlika izinyembezi ngesikhathi kuyiwa ezindlini zokushintshela ngesikhathi sekhefu.
Esiwombeni sesibili iSundowns iqhubekile nokuba yiphela endlebeni ingena ebhokisini leCity kodwa kuze kwaba yikabili unozinti wezivakashi uGeorge Chikova evimba amabhola amabi kaZwane.