LILENGELA engozini yokuphucwa ibhande lo mhlaba ibhokisa laKwaZulu-Natal.
Leli phephandaba lithole ukuthi * -Innocent “Tycoon” Mantengu ongumpetha we-International Boxing Federation (IBF) Continental Africa Super Bantamweight uzolwa noThato Bonokoane waseGoli empini yebhande lakuleli le Super Bantamweight ezoba ngoMashi 30, eKagiso Memorial and Recreational Centre, eGoli. Le mpi iqhathwa iTeam Dida Boxing Promotions kaDida Dipheko.
Libuye lathola ukuthi ngakolunye uhlangothi uThulani “Sir” Magudulela weLudonga Boxing Promotions umatasa uhlela umqhudelwano wezimpi obekulindeleke ukuthi uMantengu avikele kuwo ibhande le IBF. Umqhudelwano weLudonga kulindeleke ukuthi ube ngo-Ephreli.
Ukuvela kwezindaba zokulwela isicoco sakuleli kukaMantengu osezinze eGoli kuthiwa sezimphazamise kanzima emoyeni uMagudulela okuyisitebela sakhe esanqobisa lo mshayisibhakela lesi sicoco esiyisango lempumelelo.
Okukhathaza uMagudulela obuye abe umqeqeshi ukuthi uma uMantengu eke walilwela ibhande lakuleli uzophucwa elomhlaba.
Ethintwa lo mqhathi ukuqinisekisile ukuthi abaphathi abasha bakaMantengu bamazisile ngempi yesicoco sakuleli. Uthe usehluleka nokulala ngenxa yalezi zindaba. Uthe uma uMantengu eke wangena eringini inhlangano ye-IBF izomphuca isicoco sayo.
“Lezi zinhlangano zamabhande amakhulu kazifuni lutho oludicilela phansi isithunzi sazo. Uma ibhokisa liphethe isicoco sazo kazifuni lilwele ibhande elingaphansi kwesazo ngokwezinga. Lokhu zikuthatha njengenhlamba. Ngiyazi ukuthi kumele ukube kade uMantengu isicoco sakhe somhlaba asivikela kodwa bese sivumelene ne-IBF ukuthi ngizomqhatha ngo-Ephreli. Ngikhuluma nawe nje ngimatasa nomnyango wezemidlalo ngokulekelela uMantengu. Yeka nini amandla ami angaka nginqobisa uMantengu leli bhande eselizohamba kalula,” kuzikhalela uMagudulela.
Lo phromotha usole umphathi omusha kaMantengu, uSamson Ndlovu ngokungazi lutho ngesibhakela nokufuna ukudicilela phansi uMantengu ngoba kungowaKwaZulu-Natal.
“Ngibazi kahle abantu baseGoli, balwisa uMantengu empini yesicoco sakuleli ngoba befuna aphucwe i-IBF. Kuzothi uma seyingaphethwe muntu i-IBF, banike amabhokisa abo ithuba lokuyilwela,” kubeka uMagudulela.
Imizamo yokuthola uNdlovu kayiphumelelanga.
Nokho kuthintwa uMantengu obezwakala ephatheke kabi, uthe ukungaxhumani ngendlela efanele noMagudulela yikona okumenze wasayina isivumelwano sokulwela ibhande lakuleli.
“Empeleni i-IBF kumele ukuba ngiyivikele ngonyaka odlule. UMagudulela ungitshele ukuthi ngizolwa ngasekupheleni kukaMashi kodwa sangabe sisaba nokuxhumana. Kangisebenzi, yimina engibheke ikhaya eMtubatuba. Ngiyadinga ukulwa ukuze ngizokondla umndeni wami. Ngibuhlungu ngokuthi ngizolahlekelwa ibhande lo mhlaba engalithola kanzima. Ngicela ubaba uMagudulela azi ukuthi kangiqondile ukumdicilela phansi, ngikuleli zinga kungenxa yakhe,” kubeka uMantengu.
Kuthintwa uThobile Sifunda iHOD yomnyango wezemidlalo KwaZulu-Natal ukuvumile ukuthi uMagudulela wayesifakile isicelo sokwenza umqhudelwano. Leli bhande le-IBF ulithathe empini ebingoMeyi wanyakenye.