SIBUSISO MDLALOSE
ILAMONTVILLE Golden Arrows iziphuthisele ngethuba lokuphazamisa iMamelodi Sundowns esicongweni se-log yeDSTv Premiership, ibambana ngo 1-1 neCape Town City eSugar Ray Xulu Stadium, eClermont, izolo ntambama.
I-Arrows ibidinga iwini kulo mdlalo ukuze ikwazi ukuvala igebe phakathi kwayo neMamelodi Sundowns ehlezi phezulu kwi-log yePremiership.
ICity, okuyiyona eqede irekhodi le-Arrows lokungashaywa kule sizini ngomzuliswano wokuqala, yiyona ebone ipali kuqala emdlalweni ngonyawo luka-Abdul Ajagun, zibekwa nje ebhandeni ngomzuzu wesine umdlalo uqalile.
UVelemseni Ndwandwe ulamulele Abafana Bes'thende ebashayela elokulinganisa ngomzuzu ka-13.
Nakuba womabili amaqembu ewatholile amathuba okubhakuzisa inethi emdlalweni, ukuhluleka kwabadlali bawo ukubona inethi yikho okuholele ekutheni agcine ngokuthi acazelane amaphuzu.
Ukunqoba kwaBafana Bes'thende umdlalo bekuzobenza balingane naMaSandawane phezulu kwi-log yePremiership, njengoba iDowns isahlezi phezulu ngamaphuzu angu-39 emidlalweni engu-17, Abafana Besthende besendaweni yesibili nganngu-37 emidlalweni engu-21.
Kusasa kubhekeke ukuthi i-Orlando Pirates ngabe izokwazi yini ukuthola amaphuzu aphelele emdlalweni wayo nezimbangi, iKaizer Chiefs.
Njengamanje iBucs ihlezi endaweni yesithathu kwi-log ngamaphuzu angu-35 emidlalweni engu-20.
Abafana Bes'thende bebeze emdlalweni behambela phezulu ngemuva kokunqoba imidlalo emithathu ilandelana, emibili yawo ibidlalela ekuhambeni eLimpopo.
Komunye umdlalo, iChippa United neSwallows FC badlale ngokulinganga kuba ngu 2-2 eSisa Dukashe Stadium, eMonti izolo ntambama.
AmaSwayiswayi yiwona ahambe phambili ngo 2-0 ngokuphazima kweso. Ukube abalandeli bebekhona bebezobe besahlela izindawo zokuhlala.
EPeter Mokaba Stadium, ePolokwane, iBaroka neBloemfontein Celtic nabo bahlukaniselane amaphuzu bedlala ngokulingana kuba ngu 1-1 izolo ntambama.