SITHEMBISO MKHIZE
UMQEQESHI weLamontville Golden Arrows, uMandla Ncikazi, ubalisa ngabezindaba athi sebevele balibethele esiphambanweni iqembu lakhe ngaphambi komdlalo womkhaya, naMaZulu, ongo-3 ntambama ngoMgqibelo eSugar Ray Xulu Stadium, eClermont.
Abaningi lo mdlalo obhekwe ngabomvu bathi uzocacisa ukuthi iyiphi inkunzi phakathi kwalama qembu, ikakhulukazi kule sizini.
Isizathu esenza ukuthi wonke amehlo athi njo kuwo, ngisho nakubantu abangebona abaKwaZulu-Natal, yizimanga ezigilwa yila maqembu kwiDStv Premiership kule sizini. l
Selokhu yasungulwa iPremier Soccer League (PSL) kungokokuqala ukuthi alandelane kwi-Top 3, abe sembangweni wesicoco seligi.
USuthu oluphekwa uBenni McCarthy lukweyesibili ngamaphuzu awu-47, emidlalweni ewu-25.
Luseli ngephuzu elilodwa kwiMamelodi Sundowns eqhwakele enemidlalo ewu-23.
NgoLwesithathu AmaZulu abhaxabule iCape Town City ngo 5-1 eCape Town Stadium.
Abafana Bes'thende babambe indawo yesithathu ngamaphuzu awu-43 emidlalweni ewu-25.
NgoLwesithathu batshengisile ukuthi kabasabi qembu ngesikhathi besho ukuyiqeda Sundowns. Lo mdalo obusekuhambeni, uphele zibambene ngeqanda.
"Njengoba senzile emdlalweni weSundowns, nakowaMaZulu sizolwa phezu kwayoyonke imibiko yabezindaba. Sebeveli sebeshilo ukuthi amaphuzu amathathu aya oSuthwini. Indlela izinga lokungayihloniphi i-Arrows eliphezulu ngayo nokuhlale benika AmaZulu idumela, ungafunga ukuthi basebenzela wona. Nakuba kunjalo sizoqhubeka nokuzithoba, sisebenze kanzima. Asilona iqembu noma abaqeqeshi abangosaziwayo,“ kusho uNcikazi ngemuva komdlalo weSundowns.
UNcikazi uqhube, wathi:"Ngibonga kakhulu kubadlali bami ngokungasabi qembu, sisayibambe ngakho. Sigijima umjaho wethu, kasigxilile kokwenziwa amanye amaqembu. Kasiwunakile wonke lo msindo okhona wezibalo ze-log, kusesekuseni. Uma ithuba livuma ukuthi siye e-Afrika, sizokwenza lokho. Uma kumele siqede siphezulu ngeke siliyeke lelo thuba. Kuyangijabulisa ukuthi emidlalweni emithathu yakamuva esiyidlalele ekuhambeni asishaywanga.
"Ingijabulisile indlela esidlale ngayo neSundowns. Abafana bami bayilandele yonke imiyalelo ebesibanike yona. Ngikholelwa ekutheni bekumele sinqobe, sakhe amathuba amaningi. Ngokujwayelekile iSundowns igcwala esiswini, uma uke wayiyeka yazichanasela uba senkingeni.“