XOLILE MPISANE
South Africa (3) 4
Nigeria (0) 2
LIKHOMBISILE ukuthi selilikhuphule kangakanani izinga iqembu lakuleli lebhola labesifazane, iBanyana Banyana, liqumba phansi iNigeria ngo 4-2 emdlalweni we-Aisha Buhari Cup obuseMobolaji Johnson Stadium eLagos ngoLwesibili ebusuku.
Womabili lawa maqembu abeyinqobile imidlalo yawo yokuqala kulo mqhudelwano. INigeria yaguqisa iMali ngo 2-0, iBanyana yadla iGhana ngo 3-0.
Kuyiwe ekhefini iqembu lakuleli lihamba phambili ngo 3-0, elokuqala kube umkhonto ogwaze ekhaya ngonyawo lukaChidi Alozie, amanye ashaywa nguLinda Motlhalo (iphenathi) noGabriela Salgado.
I-Nigeria ejwayele ukuthwalisa kanzima elakuleli, ibuyile ngasekuqaleni kwesiwombe sesibili ngamagoli kaVivian Ikechukwu. UMamello Makhabane washayelela isipikili sokugcina ngasekupheleni komdlalo, yanqoba kanjalo iBanyana.
Igoli lokuqala lingene ngomzuzu wesihlanu, uHildah Magaia uthole ibhola engamakiwe kwesokunxele, waligobela ebhokisini, lavalelwa phakathi isitobha seNigeria u-Alozie, obezama ukukhipha amanzi endlini.
Iqhubekile nokuwuphatha umdlalo iBanyana, uThembi Kgatlana ehlasela kuzona zombili izinhlangothi. Ithole iphenathi ngomzuzu ka-18, u-Ebi Onome ulibambe ngesandla ebhokisini ibhola, uMotlhalo wayibeka phakathi engabonanga lutho unozinti.
AmaSuper Falcons acabange ukuthi ayayithola indlela yokubuyela emdlalweni ngesikhathi uDesire Oparanozie ebhakuzisa inethi emuva kokuphuca uJanine van Wyk ibhola ebhokisini, kodwa iduku beseliphakeme, igoli langabalwa.
Kusale kancane ukuthi ezikaDesiree Ellis zithole elesithathu ngomzuzu ka-33, uVan Wyk uliphakamisele ebhokisini, uRefiloe Jane wazama ukulibeka phakathi ngekhanda, unozinti weNigeria uCynthia Nnadozie waliphebezela phezu kwepali.
Igcine ilitholile ngomzuzu ka-44, uKgatlana ungingqe phansi u-Esther Ogbonna ngomjiko kwesokunxele, ibhola lakhe lashaya epalini, waqhamuka engamakiwe uSalgado walingqomfela enethini.
Iqembu lasekhaya lenze izinguquko ngaphambi kokuqala kwesiwombe sesibili lasheshe lalithola igoli ngomzuzu ka-46, elakhiwe laphinde lavalelwa abadlali abebephuma ebhentshini.
UGift Monday ugobe ibhola ebelihamba phansi ngakwesokunxele, unozinti weBanyana uKaylin Swart wahluleka ukulivimba, u-Ikechukwu walibeka enethini ezihambela yedwa kwesokudla.
U-Ikechukwu uphinde wabuyisa ithemba kumaSuper Falcons ngegoli lesibili alishaye ngomzuzu ka-53. Ulithole esiswini ibhola washoshela phambili ngaphambi kokudonsa intambo ende ayizwe ngendaba uSwart.
Ibisingena ingenile iNigeria, wasebenza uSwart ngomzuzu ka-61 echiliza ishodi likaGlory Ogbonna, obelintshontshe ezinyaweni kuKgatlana ngakwesokudla.
Amathemba eqembu lasekhaya ashabalale ngomzuzu ka-86 iBanyana ithola igoli lesine. UMakhabane uyibeke enethini ngobunono iphenathi emuva kokuthi uMotlhalo ethelwe phansi nguMonday ebhokisini.
Lo mphumela usho ukuthi iBanyana iyona engompetha balo mqhudelwano obuwenziwe egameni likankosikazi kamengameli waseNigeria, u-Aisha Buhari. Inhloso ukulwa nesihlava sokuhlukunyezwa kwabantu besifazane.