Kaizer Chiefs (1) 1
AmaZulu (0) 1
AMAZULU aphazamise umgqigqo weKaizer Chiefs eyibamba ngo-1-1, ngoLwesithathu, eFNB Stadium.
AMakhosi asizwe umkhonto ogwaze ekhaya kaKeagan Buchanan ngomzuzu ka-20 ukuthola igoli ahambe ngalo phambili.
Ibhola beligotshwe ubizo wakhe, uDolly weChiefs, oqhamuke kwesokunxele ebhokisini loSuthu.
EloSuthu lishaywe uBongi Ntuli obesuka ebhentshini. Ulivalele phakathi ngoka-76, enikwa u-Andre de Jong naye obesuka ebhentshini.
Kulo mdlalo, iChiefs yenze ushintsho lwabadlali ababili kwisikwati eshaye ngaso iMaritzburg United kodlule.
Iqale ngoNjabulo Blom noKgaogelo Sekgota.
AmaZulu enze olwabathathu eqenjini elibambane neStellenbosch.
Aqale ngoSiphesihle Maduna, Keagan Buchanan noSamkelo Mgwazela.
IziMpofana zinyukele kweyesihlanu ngamaphuzu awu-19, emidlalweni ewu-12.
AmaZulu azoqhubeka nokuhlala kweyesishiyagalombili ngawu-16.
Kuyiwe kulo mdlalo abalandeli beChiefs benethemba lokuthi izoqhubeka nokuvulela isibhaxu kwazise kwemibili eyedlule inqobe kulandelana.
Ishaye omkhaya bayo i-Orlando Pirates neMaritzburg United.
Bekuzoba kungokokuqala kule sizini inqoba imidlalo emithathu kulandelana.
Abalandeli boSuthu kuhlanganisa nomengameli walo, uSandile Zungu, lo mdlalo bebewuthatha njengowamagqubu. Bebethemba ukuthi bazoziphindiselela.
Emlenzeni wokuqala la maqembu abambana ngo-1-1, eThekwini.
USuthu yilo olwabona kuqala imbobo yepali.
Kwathi kungasalindele muntu, sekufakwe esikhathini esengeziwe, unompempe uJelly Chavani, wanika iChiefs iphenathi.
Wathi ibhola lishaye esandleni sikaThapelo Xoki kanti lishaye esifubeni.
Akachithanga sikhathi uDolly wayivalela phakathi.
Ngalesi sinqumo uChavani nephini lakhe uMoeketsi Molelekoa baziqhatha neSafa. Bamiswa amasonto ayisithupha.
Esiwombeni sokuqala kazibanga bikho iziwombe ezibe yingozi. Ukukhahlelelwa kwepali kuze kwabonakala ngoka-14, uMaduna ethulula inguzunga ephume eceleni kwepali.
IChiefs ibidlala kakhulu ohlangothini lwesokudla, uDolly ebambisene Njabulo Blom. UGumede, Maduna, Siyethemba Sithebe noBuchanan bebezama ukuyihlanganisa, belekelelana no-Augastine Mulenga phambili.
UReeve Frosler weChiefs ube neshwa elimala usanda kuqala umdlalo. Endaweni yakhe kungene uRamahlwe Mphahlele othole ikhadi eliphuzu efika ngakho kodwa.
Kwesibili uSuthu lubuye ngamandla lwenza izinguquko zabadlali abahlanu okungoNtuli, De Jong, Luvuyo Memela, Lehlohonolo Majoro noHendrick Ekstein.
Kulusebenzele lokhu, abanye babadlali bezitha baqale batatazela. Ngoka-60, u-Alexandra Cole uthole ikhadi elibomvu emuva kokudlalisa kabi uThabo Qalinge. Kungakapheli sikhathi esingakanani AmaZulu athole igoli.
Ukungena kukaLebohang Manyama kwenzele iChiefs isimo sangcono. Lo mdlali udlaliswe kabi uSamkelo Mgwazela naye okhishwe ngelibomvu.
NgeSonto, iChiefs izophuma omunye umkhankaso wokuzama ukusondela kwaphezulu lapho seyidlala neSwallows, eDobsonville Stadium. AmaZulu aya kowomkhaya neMaritzburg United ngalo iSonto, eHarry Gwala Stadium.