AMAZULU agaqele obengumgadli we-Orlando Pirates, u-Augustine Mulenga, okhonjwe indlela kweZimnyama ngesonto eledlule.
USuthu lusembhidlangweni wokuqinisa iqembu ukuze luhlangabezane nezimfuno zabaphathi abasha abalimise ngesihloko elokuthi bafuna lubalwe namaqembu amane azoqeda phezulu kwiDStv Premiership ekupheleni kwesizini ka-2020/2021. Lusinde ezembeni sekuvalwe amehlo ngedlule. Umthombo ozazi zonke ezaMaZulu uthe afuna ukusayinisa uMulenga waseZambia.
“UMulenga ngomunye wabadlali iqembu elibafunayo njengoba lihlomela ukuqala kwesizini. Izingxoxo ziqalile. Kuzobonakala ngokuhamba kwesikhathi ukuthi kwenzekani.”
UMulenga ufike kwelengabadi ekuqaleni kwesizini ka-2017/2018 ehambisana nomkhaya wakhe uJustin Shonga besayiniswa ngumqeqeshi uMilutin “Micho” Sredojevic. Emuva kokushiya kukaMicho bathwale kanzima ukuthola isikimu kuRhulani Mokoena noJosef Zinnbauer.
Izolo AmaZulu abekade ethula ijezi lawo elisha endaweni ekhethekile yemishado iZunguness, eHowick. Umcimbi ubukade uhanjelwe yindlovukazi yeSilo Samabadla, uMaNdlovu, nongqongqoshe wezeMidlalo KwaZulu-Natal, uHlengiwe Mavimbela.
Umphathi omusha woSuthu, uSandile Zungu, ukugcizelele ukuthi lizoqiniswa iqembu.
“Bakhona abadlali esikhuluma nabo kumanje. Ngikholwa wukuthi ezinsukwini ezimbalwa ezizayo sizovumelana nabo, baqale ukuzozilolonga noSuthu ukuze sibhekane ne-Orlando Pirates sebekulungele ukudlala uma umqeqeshi ebaqoka. Laba badlali ngeke sibagagule ngamagama ngoba abanye babo basemaqenjini, abanye bangaphandle kwezwe. Kuwukubahlonipha nje ngoba sisakhuluma, asikavumelani. Kodwa sizothi uma sesivumelene bese sibethula esithangamini ukuthi naba abawuSuthu olumabhesh’ ankone. Kodwa sizokwenza isiqiniseko sokuthi siyaqinisa emuva, esiswini nakubagadli,” kusho uZungu.
Uma uMulenga egcina esayinile kuMaZulu, uzobhekana neqembu asuka kulo kwazise azovula ne-Orlando Pirates emdlalweni weligi ozoba seKings Park Stadium ngo-Okthoba 24. Kubadlali abavele baziqeqesha noSuthu kukhona uSiphelele Mthembu obekwiCape Town City noMakhehleni Makhaula obeyibamba kwiHighlands Park esidayisiwe.