INHLANGANO eyengamele ibhola likanobhutshuzwayo iSouth African Football Association (SAFA) isiqinisekise umdlalo wobungani ozoba phakathi kweBafana Bafana neZambia ozobanjelwa eLusaka Stadium ngo-Septhemba 7.
IBafana izobe idlala okokuqala selokhu yakhishwa yiNigeria kuma-quarterfinals e-African Cup of Nations emdlalweni ogunyazwe ngaphansi kwekhefu le-FIFA langoSepthemba lemidlalo yeligi emhlabeni.
Iqembu lizoholwa nguMolefi Ntseki osabambe isikhundla sikamqeqeshi njengoba kwesula uStuart Baxter ekuqaleni kwenyanga. UNtseki kulindeleke ukuthi abize isikwati sabadlali abangu-23 azogadla ngaso kulomdlalo ngesonto elizayo.
IBafana iseqoqweni lesithathu (Group C) lokuhlungela i-African Cup of Nations (AFCON) ezosingathwa iCameroon ngonyaka ka-2021, kanti izobhekana neSudan, Ghana kanye neqembu elizonqoba phakathi kweMauritius Sao Tome e Principe.