AKAFUNI nokuyikhuluma eyokudla isicoco noma eyokudlulela esigabeni somkhumulajezi umqeqeshi weqembu lesizwe laseNingizimu Afrika lika-Under 20, uThabo Senong.
NgoMsombuluko Amajita athele othulini iCameroon ngo 3-1 emdlalweni wokuqala weCAF Africa Cup of Nations eLevy Mwanawasa Stadium, eNdola, eZambia. Amagoli Amajita abaselwe enethini nguLuther Singh kwathi elokubika lama-Indomitable Lions lavalelwa enethini ngu-Eric Ayuk.
Amajita yiwona ahlezi esicongweni kuGroup B ngamaphuzu amathathu ngemuva komdlalo owodwa. Kusasa ngo-6 ntambama azodudulana neSenegal eLevy Mwanawasa Stadium ngo-6 ntambama.
EzikaSenong zidinga amaphuzu amathathu ukuze zizibekisele indawo kuma-semi final. Amaqembu amane azozibekisela indawo kuma-semi final azozitholela ithikithi lokuyodlala eNdebeni yoMhlaba eseSouth Korea ngoMeyi.
“Kumele inconywe iCameroon ngomdlalo onzima esinike wona. Sishaye iqembu elinzima. Asizele lapha ukuzokhuluma ngokunqoba umqhudelwano noma ukuzibekisela indawo eNdebeni yoMhlaba. Indlela esenza ngayo izinto yehlukile. “Sifuna ukubhekana nomdlalo owodwa ngesikhathi. Okunye kuzolandela. Njengamanje sesizogxilisa imiqondo yethu emdlalweni weSenegal. Ngeke sikhulume ngama-semi final noma ngokuba ngompetha balo mqhudelwano ngoba sisebenza nabafana abancane. Abanqeni ukuvele balahle umgqigqo. Badlale kahle kodwa kumele sibagcine begqugquzelekile ukuze sizokwenza isiqiniseko sokuthi bagxila emdlalweni weSenegal,” kusho uSenong.
Amajita agcina ukudlala eNdebeni yoMhlaba ngo-2009 ngesikhathi ibanjelwe e-Egypt. Kusukela lapho Amajita awakaze aphinde angene kulo mqhudelwano.
“Umsebenzi esesibhekene nawo ngowokuhlaziya ubungozi nobuthaka beSenegal. Sidlale kahle kakhulu futhi ukusebenzisa ijubane kube ngukhiye wempumelelo yeqembu.
“Bahle uma bephethe ibhola futhi ijubane labo balisebenzisa ngendlela esisuke sihlele ngayo. Ngifuna ukubancoma kakhulu abafana bami ngokulandela imiyalelo. Sishaye iqembu eliyingozi futhi ngikholwa wukuthi sisazokwenza kahle kulo mqhudelwano,” kusho uSenong.
Emdlalweni wokugcina Amajita azoshukana neSudan.
“Leli yiqembu lesizwe. Sihlale senza isiqiniseko sokuthi sikhetha abadlali abaseqophelweni eliphezulu. Eqenjini lethu sibophele abafana abanekhono kodwa futhi abazithobile nabalalelayo. Asinakho ukungabaza ukuthi bazoqhubeka nokwenza kahle.
“ Akulula ukulolonga abafana bancane abaneminyaka engu-19 kuya ku-20. Sonke silapha ukuzokhulisa abadlali. Emidlalweni elandelayo sizoqhubeka nokusebenza kanzima siphinde sakhe nenqwaba yamathuba okushaya amagoli,” kuphetha uSenong.