Bakhala ngamaqakelo anikwa noGrade R
IPHINI likaMengameli weNatu, uMnuz Allen Thompson, noMnuz Siphosethu Ngcobo, onguMengameli, benoNgqongqoshe wezeMfundo, uNkk Angie Motshekga, abazohlangana naye kuleli sonto befuna kwenziwe uphenyo ngokusatshalaliswa kwamaqakelo adle ngaphezulu kukaR120 million ezikoleni zesifundazwe Isithombe:MOTSHWARI MOFOKENG IPHINI likaMengameli weNatu, uMnuz Allen Thompson, noMnuz Siphosethu Ngcobo, onguMengameli, benoNgqongqoshe wezeMfundo, uNkk Angie Motshekga, abazohlangana naye kuleli sonto befuna kwenziwe uphenyo ngokusatshalaliswa kwamaqakelo adle ngaphezulu kukaR120 million ezikoleni zesifundazwe Isithombe:MOTSHWARI MOFOKENG
KUKHALWA ngamaqakelo ahlinzekwa ngumnyango wezeMfundo KwaZulu-Natal okuthiwa abafundi abawafuni nothisha kuthiwa abasazi bezenjani ngawo.
Kuthiwa amaqakelo asenikwa ngisho abafundi abenza uGrade R ukuze aphele.
Lokhu kuvezwe nguMnuz Allen Thompson, iPhini likaMengameli weNatu njengoba libikele noNgqongqoshe wezeMfundo kazwelonke uNkk Angie Motshekga.
I-Natu ibike kuNkk Motshekga ukuthi aphenye ngalolu hlelo okuthiwa ludla ngaphezulu kukaR120 million esikhundleni sikaR20 million okwakukade ehlelelwe ukuthi adle wona. Amaqakelo asatshalaliswa kuzona zonke izikole esifundazweni.
UNkk Motshekga uthe ukhulumile noNgqongqoshe wezeMfundo KwaZulu-Natal uMnuz Mthandeni Dlungwane wamtshela ukuthi agxile ezintweni ezithinta ukuhlinzekwa kwemfundo kunokuthi kusatshalaliswe inqwaba yamaqakelo nasezikoleni ezingawadingi.
“Sifuna kuphenywe ngoba agcwele, akusasebenzeki emakilasini. Ngendlela amaningi ngayo kuyothatha iminyaka ngaphambi kokuba aphele. Kungani kwathengwa amaqakelo amaningi kangaka ekubeni kunezinkinga ezinkulu kangaka ezikoleni?” Kubuza uThompson.
Okhulumela uDlungwane, uMnuz Kwazi Mthethwa, uthe ungqongoshe uzokhuluma nabezindaba ngalokhu nezinye izinto kusasa.
“Ungqongqoshe ubize isithangami sabezindaba ukuze acacise ngezinto ezisabalele emphakathini.
“Uzokhuluma ngezinsolo zokudayiswa kwezikhala, ukuqashwa kothisha, ukuhlinzekwa kwezinsiza kufundisa okuthinta nezincwadi nezinye izinto,” kusho uMthethwa.
UThompson uthe basola inkohlakalo ngalolu hlelo ngoba imali yalo iyakhishwa nyanga zonke.
“Ziningi izinto umnyango ohluleka ukuzenza, awubaqashi othisha awuzilungisi izikole awukhokheli abantu abaphakayo kodwa ukwazi ukufuhlela amaqakelo ezikoleni. Okubuhlungu wukuthi kunikwa nezingane ezenza uGrade R ezingawadingi,” kusho uThompson.
UThompson uthe: “Sizohlangana noNgqongqoshe kazwelonke ngoLwesithathu lapho sizokhuluma khona ngezinye izinto eziningi ngoba sifuna umnyango ufakwe ngaphansi komlawuli ngoba inhloko yomnyango uNzama (Dkt Enock) noDlungwane sebehlulekile.”
Omunye wabazali ocele ukungavezwa, ingane yakhe efunda uGrade 4 kwesinye sezikole eThekwini, uthe ingane yakhe (11) wayibona isibuya nawo amaqakelo engazelele.
Uthe ngenxa yokuthi yase ibuye nawo kwadingeka akhulume nayo ngendaba yokuya ezinsukwini.
“Okubuhlungu wukuthi ingane yanikwa kwathiwa eyokuvimba igazi. Abayichazelanga kahle ukuthi awani,” kusho umzali.