INKAMPANI yonogada kuleli isiveze ukuthi izonyusa isibalo sabasebenzi bayo ukuqinisekisa ezokuphepha kulezi zinsuku ezingu-21 okuzobe kuvalwe thaqa izwe ngenxa yeCoronavirus.
Bangaphezu kuka-55 000 onogada bakwaFedility Services Group, abazotshalwa ezindaweni ezahlukene ukuqinisekisa ezokuphepha kumakhasimende ale nkampani nasemphakathini.
Oyisikhulu esiphezulu senkampani uMnuz Wahl Bartmann, uthe akukona ukuphepha ngokwezempilo kuphela okubalulekile kulesi sikhathi esinzima. Uthe ukusebenza kwabo kuzohambisana nemigomo ebekwe uMengameli Cyril Ramaphosa neWHO. UBartmann uthe izinombolo zocingo zizosebenza ubusuku nemini ukusiza abadinga usizo.
Kulezi zinsuku ziningi izigameko zokudunwa kwezimoto ezindaweni ezahlukene eThekwini.
UMnuz Zwakele Mncwango, oyilungu leDA esiShayamthetho, ungomunye wabasinde edunwa imoto ngoLwesithathu ngakwakhe eWestville. Uhlaselwe ngamadoda amahlanu eyongena kwakhe.
“Ngisola ukuthi babone ukuthi uma bengidubula kuzoba nzima ukubaleka ngoba umuzi wami usekugcineni komgwaqo. Ngithathe ukhiye wokuciphiza i-alamu, babaleka kanjalo,” kuchaza uMncwango.
Kwesinye isigameko esenzeke ngoLwesithathu, umshayeli weToyota Etios utholakale evalelwe ebhuthini yemoto yakhe eMount Moreland ngaseMdloti. AbeReaction Unit South Africa (Rusa), bathintwe ngezithuba zabo -7 ebusuku ngalesi sigameko. Kuthiwa le moto ibisebenza njengetekisi ethutha abagibeli.
Esitatimendeni seRusa kuthiwa umshayeli utholakale esaphila emotweni. Udunwe imoto eGreyville ngabathathu abebegqoke imifaniswano yamaphoyisa. Isitatimende sithi:
“Oyedwa wabo bekungowesifazane. Baphoqe umshayeli ukuthi angene ebhuthini, bahamba nemoto ephakathi.”
Kuthiwa umshayeli usindiswe ukuthi imoto ibisilandelwa nge-tracker, abasolwa bayishiya kanjalo.
Kudunwe nowesifazane ngabantu abebezenza abagibeli abacele ukuhanjiswa ePhoenix, ngoLwesithathu. Bathathu abasolwa okuthiwa badune le moto yohlobo lweVW Polo.
Lo wesifazane ubizwe ngendlela yokusebenzisa ubuchwepheshe beselula, esetshenziswa ngabagibeli bezimoto zamatekisi ezincane. NgokweRusa kuthiwa abasolwa bakhiphe ummese baphoqa umshayeli ukuthi ayikhombe eNtuzuma imoto.
OThongathi kwebiwe iVW Polo kuHigh Street, okumanje ayikatholakali. Abanolwazi ngale moto okuthiwa inombala ompunga nezinombolo ezithi: NUR 45849, kumele bashayele iRusa ku-086 1234 333.
Okhulumela amaphoyisa KwaZulu-Natal, uColonel Thembeka Mbele, uthe abakwazi ukuqinisekisa izibalo zokudunwa kwezimoto kodwa amaphoyisa aphume umkhankaso wokulwa nobugebengu ubusuku nemini.