UMNYANGO wezeMfundo eyiSisekelo kuzwelonke, usumemezele isinqumo sawo sokuchibiyela ikhalenda lezemfundo lonyaka ngenxa yokuphoqwa yisimo sokubheduka kweCorona kuleli.
Isitatimende somnyango esithunyelwe kwabezindaba, siveza ukuthi izikole zizovulwa ngo-Agasti 24, bese kuthathwa ikhefu lesonto elilodwa, ngo-Okhthoba 26, kubuyelwe ngomhla ka-30 enyangeni efanayo.
Isitatimende siveza ukuthi inhloso yekhefu lesonto wukwehlukanisa amakota onyaka.
Emuva kwalokho kuyodonswa kuze kuyovalwa ngoDisemba 15, 2020. Izivivinyo zika-matric kulindeleke ukuthi zibe seziqediwe ngoDisemba 15 bese kuqala ukumaka kuze kuqedwe ngoJanuwary 23, ukuze imiphumela ikhishwe ngoFebhuwari 23, 2021.
Ngonyaka ozayo, izikole ziyovula ngoJanuwari 25.
Kumenyezelwa lesi sinqumo nje, izikole zivele zivaliwe emuva kokuthi kube nezikhalo ngokusabalala kwegciwane iCorona ezikoleni.
Isinqumo sokuvala izikole samenyezelwa nguMengameli uCyril Ramaphosa.
Isitatimende siveza ukuthi isinqumo sokwelula kuchibiyelwe ikhalenda lezemfundo sithathwe emuva kokubonisana nazo zonke izinhlaka ezithintekayo.
Kuvele ukuthi uNgqongqoshe wezeMfundo eyiSisekelo, uNkk Angie Motshekga, uzokhipha imiyalelo yonke maduze nje, acacise ngendlela okuzosetshenzwa ngayo.
Udaba lwezikole luke lwaba sematheni kuleli, behlukene kabili abantu, abanye bethi kazivalwe izikole kubonwe ngonyaka ozayo, abanye bethi imfundo ibalulekile.