UGCINE esifakile isicelo sokuba anikezwe ikhefu lesikhashana owayengumengameli wakuleli, uJacob Zuma, ukuze akwazi ukuhambela umngcwabo womfowabo.
Umfowabo kaZuma, uMnuz Michael Zuma, oshone emasontweni amabili edlule kulandela ukugula, uzongcwatshwa emzini wakhe oseNkandla kusasa.
UZuma udinga imvume eMnyangweni wezokuHlunyeleliswa kweziMilo ukuze akwazi ukuhambela lo mngcwabo njengoba edonsa isigwebo sezinyanga ezingu-15 ejele eliseMtshezi, ngecala lokwedelela umyalelo weNkantolo yoMthethosisekelo.
Lo mnyango ukuqinisekisile ukuthi uZuma usifakile isicelo sokuba anikezwe ikhefu lesikhashana.
Okhulumela umnyango, uMnuz Singabakho Nxumalo, uthe umnyango usasicubungula lesi sicelo.
“Akukho sinqumo esisathathiwe okwamanje.”
Uma isicelo sikaZuma singagcina siphumelele, angabonakala okokuqala emphakathini kusukela azinikela emaphoyiseni emasontweni amabili edlule.