UZINIKELE esiteshini samaphoyisa ngoMsombuluko ekuseni ungqongqoshe womnyango waseMpumalanga osolwa ngokuthinteka emacaleni amabili okubulala nelilodwa lokuzama ukubulala.
Lo ngqongqoshe, elingakadalulwa igama lakhe njengoba engakaveli enkantolo, ubephelezelwa ummeli wakhe ngesikhathi ezinikela esiteshini samaphoyisa eNelspruit.
Okhulumela amaphoyisa kuzwelonke uBrigadier Vish Naidoo, uthe ungqongqoshe usolwa ngokubandakanyeka esigamekweni sokubulawa kwababili abadutshulwa, kwalimala oyedwa eMbombela ngo-Agasti 22.
“Ungumsolwa wesithathu oseboshiwe kuleli cala. Ngo-Okthoba 17 amapahoyisa abophe uMnuz Joseph Charlie Ngwenya (35) noMnuz Tshepo Matsane (30).”
UNaidoo uthe abasolwa badedelwe ngebheyili kaR20 000 ngoLwesihlanu.
Uthe kulindeleke ukuthi bavele enkantolo nongqongqoshe maduze.