UNGQONGQOSHE woMnyango wezokuHlaliswa kwaBantu, uNksz Thembi Simelane, uthe bazimisele ukusebenzisana nabasemijondolo ukulungisa isimo senhlalo yabo. Lokhu ukusho izolo ngesikhathi ethula isabelomali somnyango wakhe sika-R 34 billion.
Uthe usanda kuhlangana nenhlangano emele abahlala emijondolo, i-Abahlali Basemjondolo KwaZulu-Natal, ukudingida ngezindlela ezahlukene zokwenza ngcono inhlalo yasemijondolo.
"Senze isibophezelo sokuthi sizoxoxisana nobuholi babo eGauteng, eMpumalanga nase-Eastern Cape, nabanye abathintekayo ezweni lonke njengengxenye yemizamo eqhubekayo yokuqinisa ubudlelwano."
Uthe kulesi sabelomali bazibophezele ukuqeda izindlu zodaka ezingu-8 047, ukwakha izindlu ezingu-14 944 njengoba umhlaba usulungele ukuthi kwakhiwe kuwo unamanzi, ugesi, imigwaqo namapayipi endle. Uthe bazokwakha nezindlu zabaqala ukuba abanikazi ezingu-4 282 ngaphansi kohlelo iFirst Home Finance Programme, olwalaziwa ngeleFLISP (Financially Linked Individual Subsidy Programme) nezindlu zabahola kancane ezingu-3 000.
Uthe uR16.9 billion uzokwabelwa izifundazwe kuthi uR13.9 billion uye komasipala abakhulu. "Njengoba besihambela izifundazwe, kusicacele ukuthi sinezinselelo ezifanayo ezweni lonke okuyimijondolo, amaphrojekthi ezindlu amile noma angaqediwe, ukushoda kwemali nomthelela wakho omubi ekuhlinzekeni ngezindlu nokusilela emva ekwakhiweni kwazo. Izinselelo esizihlonzile zingalungiseka."
Ngaphambi kokwethula lesi sabelomali, utshele abezindaba ukuthi akusona eseDA noma esakwaSimelane kodwa esabantu okufanele bahlinzekwe ngezidingo. Ukusho lokhu kulandela isinqumo seDA ethe ngeke isivotele isabelomali sakhe ngoba ithi kufanele axoshwe kulesi sikhundla, imsola ngokulandelwa yifu lenkohlakalo.
Khonamanjalo, uMphathiswa walo Mnyango KwaZulu-Natal, uMnuz Siboniso Duma, usamukele lisabelomali wathi bazibophezele ukwenza lokhu abayalelwe wuNgqongqoshe ukuba bakwenze. "Kuyasigqugquzela ukuthi uNksz Simelane, enkulumeni yakhe uyesekile imizamo yethu yokusebenzisana nabaholi bendabuko ukuthola indawo yokwakhela abagilwa bezikhukhula izindlu. Okubalulekile, sizophuthumisa, njengomyalelo wakhe ukusebenzisa ubuchwepheshe ukwenza amaphrojekthi ezindlu ngendlela," kusho uDuma.