UNDUNANKULU waKwaZulu-Natal, uMnuz Sihle Zikalala, usexolisile ngokushaya omunye wabantu abebezitapela ngesikhathi kuqhubeka izibhelu eThekwini.
UZikalala ubonakale bukhoma kwithelevishini ebhonya omunye wabantu abebezitapela ezitolo ngoLwesithathu.
Lesi sigameko senzeke ngesikhathi uZikalala nongqongqoshe besifundazwe behambele ezindaweni ezahlukene eThekwini ukuyohlola umonakalo odalwe yilezi zibhelu eziqale ngesonto eledlule kulandela ukuzinikela emaphoyiseni kwaloyo owayengumengameli, uMnuz Jacob Zuma.
UZikalala, obethukuthele egane unwabu, ubonakale kwithelevishini ezama ukunqanda abantu abebesaqhubeka nokuzitapela phambi kwakhe.
Kwi-video esisabalaliswe nasezinkundleni zokuxhumana kubonakala uZikalala ebamba ngesidlozane omunye wabantu abebezitapela ezitolo, obephethe inqwaba yezimpahla.
Sihle Zikalala is outrightly foolish and must be held accountable for mob justice and vigilantism.
— Floyd Shivambu (@FloydShivambu) July 15, 2021
He’s legitimating thugs and criminals who think they are permitted to assault and kill people in Phoenix and other pets of KZN. He’s a fool! pic.twitter.com/Aei09ZPPZm
UZikalala, obelekelelwa ngomunye wabaqaphi bakhe ukubamba lo mlisa, ubonakala embhonya emhlane kwaze kwaba kabili.
Ekugcineni lo mlisa uphunyukile, wacela empunzini.
NgoLwesine ekuseni, ihhovisi likaZikalala likhiphe isitatimende lapho uZikalala ezwakalisa ukuzisola kwakhe ngalesi sigameko.
Esitatimendeni ihhovisi likaZikalala lithe nakuba undunankulu engazisoli ngokuzama ukubamba lo mlisa, obezama ukubaleka nezimpahla ezebiwe, kepha uyazisola ngokusebenzisa udlame.
“Undunankulu uyaxolisa kakhulu ngalesi sigameko, akakholelwa ekusetshenzisweni kodlame emphakathini kodwa futhi akahambisani nabantu abacekela phansi impahla.”
UZikalala uphinde wanxusa abantu bakuleli ukuthi basebenzisane ukuzama ukwakha kabusha lesi sifundazwe esikhahlanyezwe yilezi zibhelu.