UYAQHUBEKA umbango wokukhokhelwa komsunguli wePlease Call me, uMnuz Nkosana Makate, ofuna ukukhokhelwa imali akholwa wukuthi imfanele. Uyawuchitha uR47 million othenjiswe yiVodacom, ufuna u-R10 billion.
Izolo enkantolo yaseGauteng bekulalelwa lolu daba, okuzothatha izinsuku ezintathu.
Abameli baMakate baqale izingxoxo neJaji Wendy Hughes, elithetha leli cala ngokusebenzisa ubucwepheshe besimanje.
UMakate uyazithemba ukuthi abameli bakhe bazothola lokho akufayo.
Inkantolo icubungula isiphakamiso esenziwa yisikhulu sakwaVodacom, uMnuz Shameel Joosub.
Lokhu kulandela ukuba iNkantolo yoMthethosisekelo yanquma ngo-2016 ukuba iVodacom ibonisane noMakate, ukuthi kumele bamnxephezele ngemali engakanani.
Kwaba nokubonisana ukuthi kumele athole umhlomulo ka-5% emalini eyenziwa ngePlease Call Me.
Lolu daba lusuka ngo-2000 lapho uMakate esasebenzela iVodacom, wasungula uhlelo lwePlease Call Me elususa phansi.
Omunye wabameli bakhe, u-Advocate Gilbert Marcus SC, uthe iVodacom yathola ama-billion amaRandi ngenxa yokusungulwa kwePlease Call Me kukaMakate, ngakho kumele imnikeze umhlomulo ofanele.
“UMakate wathenjiswa ukuthi uzothola umhlomulo. Kuyinto eyaziwayo ukuthi iVodacom yathola ama-billion ngenxa yalolu hlelo. Phezu kokuba lolu hlelo lwaba impumelelo kodwa iVodacom kayifunanga ukumnika umhlomulo ofanele ngombono wakhe,” kusho uMarcus,
Emuva kokuzama ukuba babonisane ngomhlomulo ofanele neVodacom, uMakate wabe eseya enkantolo.
Abameli bakhala ngokuthi eminyakeni engu-20 edlule, iVodacom ihlulekile ukumkhokhela umhlomulo wakhe.
Abameli bathi uR47 million okhishwa yiVodacom kumele ungamukelwa ngoba kawumfanele.
Ithimba lakwaVodacom kulindelene ukuthi libeke izincomo zalo ukuthi kumele anikwe imali engakanani uMakate.