UTsiki Tsiki uthembisa abaseThekwini iwini
KUBHEKWE ukuthi alibambe kanje kuchwaze izihlwele uThabo "Tsiki Tsiki" Mooki wezinkakha zeKaizer Chiefs uma sezibhekene nezeLiverpool emdlalweni wobungani eMoses Mabhida Stadium, kusasa ngo-2 ntambama. Isithombe: GALLO IMAGES KUBHEKWE ukuthi alibambe kanje kuchwaze izihlwele uThabo "Tsiki Tsiki" Mooki wezinkakha zeKaizer Chiefs uma sezibhekene nezeLiverpool emdlalweni wobungani eMoses Mabhida Stadium, kusasa ngo-2 ntambama. Isithombe: GALLO IMAGES
LUNGILE MAJOKA
TSIKI-Tsiki Iyoh, lawa ngamagama engoma eyayishisa izikhotha yomculi we-kwaito, uMdu Masilela eyayidlisa ngeminyaka yabo-1990.
Ngalesi sikhathi nabalandeli beKaizer Chiefs babesala begezekile ngendlela ayenyakaza ngayo enkundleni uThabo “Tsiki-Tsiki” Mooki owayeyibamba esiswini.
UMooki (39) wayelihlikihla kamnandi, ekhonze isitayela esidume ngetsamaya kubathandi bebhola, okuyinto okufanele wukuthi abalandeli beChiefs bazobe beyilindele kuyena uma izinkakha zasePhefeni sezitholene nezaseMerseyside, iLiverpool, eMoses Mabhida Stadium, eThekwini, ngoMgqibelo ngo-2 ntambama.
Ngemuva kokuthi ebeke ethala amakhokho ngesizini ka-2008/2009 akukuningi okuvelile ngaye njengoba namanje kusalindelwe isethembiso somdlalo wokumhlonipha esenziwa yiChiefs.
“Ngijabule ngokuba yingxenye yalo mdlalo, ikakhulukazi njengoba sizobe sidlala neqembu elikhulu njengeLiverpool. Ngizojabula kakhulu uma singawunqoba umdlalo. Ukubuyela eThekwini kukodwa kungivusela izikhathi zakudala. Abantu bakhona bayaziwa ngokweseka ibhola njengoba kusenzeka namanje uma iBafana Bafana idlala khona. Kuzoba mnandi impela uma singabajabulisa ngokuthi siwine,” kusho uMooki.
Izinkakha zeChiefs eziphekwa nguRyder Mofokeng noTeenage Dladla ziqale ngesonto elidlule ukuzicijela lo mdlalo. “Sizwile ukuthi abantu esizodlala nabo, basangabantu abadlalayo yize sebathatha umhlalaphansi ngakho bekungamele siwuthathe kancane lo mdlalo.”
UMooki uthe lo mdlalo uqhamuke esamile kokumhlanganisa nebhola.
“Bengisayizibile kancane indaba yebhola, mhlawumbe ngizobuyela kulona eminyakeni emibili ezayo nami ngitshale lokhu engikufundile. Ngisamatasa nezinto eziseceleni engingeke ngikwazi ukuzidalula okwamanje. Engingakusho ngukuthi zithinta ibhizinisi.”
UMooki wadlalela iChiefs kusukela ngo-1994 eneminyaka engu-19. Wayeka ngemuva kokunqoba izicoco neChiefs ngemuva kwemidlalo engu-407 namagoli angu-40.
Izolo bese kusele amathikithi alinganiselwa ku-2500 kwangu-25 000 adayiswayo. Kwabayayo enkundleni amasango azovulwa ngo-11 ekuseni. Uma umdlalo uphela zibambene ngemuva kwemizuzu engu-90 kuzokhahlelwa amaphenathi.
Izolo zithelekile izinkakha zaseLiverpool eThekwini zihamba nezimbalwa zeChiefs. Ezinye zaMakhosi kubhekeke ukuthi zifike kusasa.