UTHISHA wasesikoleni sasePretoria, iCentral Secondary eSoshanguve, uquleke maqede washona izolo. UMnyango wezeMfundo eGauteng ushaqekile ngokudlula emhlabeni kwalo thisha wesifazane obeneminyaka engu48.
Okhulumela lo mnyango, uMnuz Steve Mabona, uthe lesi sigameko senzeke izolo ngoLwesihlanu emagcekeni esikole.
"Uphuthunyiswe ehhovisi eliseduze ngozakwabo. Abezimo eziphuthumayo babizwe ngokushesha kodwa bafike esikoleni engasekho emhlabeni."
Uthe izikhulu zezemfundo esifundeni zivakashelile esikoleni ngenhloso yokuyoseka nokululeka ukuba isikole siphume emuva kokwenzeka kwalesi sigameko.
Ithimba lodokotela abalapha ngokwengqondo bazolibangisa kulesi sikole ngoMsombuluko.
UNgqongqoshe wezeMfundo eGauteng, uMnuz Panyaza Lesufi, uthumele amazwi enduduzo emndenini kathisha nasesikoleni.
"Sifuna ukuqinisekisa umndeni ukuthi sinawo emithandazweni yethu kulesi sikhathi esinzima obhekene naso. Sizohlela inkonzo yesikhumbuzo yokugubha impilo kamufi," kuphetha uLesufi.
Esigamekweni esingahlobene nalesi kuvalwe isikole iRoyal Schools Princess Park campus e-Arcadia, empumalanga yePretoria emuva kokuba umfundi ehaqwe yiCoronavirus.
Ngokwencwadi ethunyelelwe abazali, umfundi kaGrade 4 ubesesikoleni ngoMsombuluko.
Kwenzeka lokhu nje uhulumeni usanda kumemezela ukuthi abafundi bakaGrade 6 navakaGrade 11 bazobuyela esikoleni ngoMsombuluko ezweni lonke.
AFRICAN NEWS AGENCY