LIYASHUBA icala likasomabhizinisi osolwa ngokudubula, abulale ibhungu ebelidume ngokudla indlangu ezinkundleni zokuxhumana, uMnuz Mlungisi Mbewana.
NgoLwesihlanu eNkantolo yeMantshi eThekwini, umbuso udalule ukuthi umsolwa uMnuz Jonas George Tsautse akasezukubhekana necala lokubulala uMbewana kuphela kodwa sekwengezwe nesigaba sokuthi wayehlelile ukumbulala.
Umbuso ushintshe icala lokubulala abebhekene nalo wamthwesa elokubulala ngenhloso.
Lo msolwa usagqunywe esitokisini, icala lakhe lihlehliselwe uLwesibili ukuze afake isicelo sebheyili.
Usolwa ngokubulala uMbewana endaweni yobumnandi eSpringfield eThekwini, ngoSepthemba 23.
Uze wazinikela emaphoyiseni ephelezelwa ummeli ngo-Okthoba 6 wavela enkantolo ngemva kwezinsuku ezimbili eboshiwe.
Lisale likhexile ithimba lamameli bakaTsautse izolo, ngenkathi umshushisi u-Advocate Nhlanhla Shange, etshela inkantolo ukuthi sebeyalishintsha icala lokubulala eliwuschedule 5 ebelibekwe umsolwa, sebemthwesa icala lokubulala ngokuhleliwe.
Lokhu kudide abameli bakaTsautse abafike enkantolo bemagange behlome nangencwadi efungelwe kamsolwa yecala lokubulala eliwuschedule 5 kepha bagcine becela inkantolo ukubuyela emumva bayohlela kabusha.
UShange uthe uTsautse kuzomele abeke izizathu ezibambekayo, eziqinile futhi ezingejwayelekile azonxenxa ngazo inkantolo ukuthi imkhulule ngebheyili. Uthe bewumbuso bazophikisana nalesi sicelo.
Imantshi uMelanie de Jager ibe isilihlehlisa icala yenza nencwadi egunyaza ukuthi uTsautse asuswe esiteshini saseSydenham, avalelwe kusona bese eyogqunywa kwesaseDurban Central.
UTsautse ungene ebhokisini labasolwa egqoke itracksuit empunga efake nesifonyo esimnyama.
Uthe engena enkantolo kwanemvunge yabantu abebezokweseka umndeni kamufi. Bese kungokwesithathu evela kule nkantolo uTsautse. Egcina ngoLwesihlanu olwedlule, umbuso wacela inkantolo iwunike izinsuku eziyisikhombisa ukuze uqhubeke nophenyo ngoba wawungakakulungeli ukulalelwa kwesicelo sebheyli sikaTsautse.
Wawufuna kuqinisekiswe amakheli ezindawo ezimbili eSandton eGoli, naseMatatiele lapho kuhlala khona uTsautse. Amaphoyisa ayesaqinisekise amakheli ezindawo ezimbili zemizi kaTsautse KwaZulu-Natal.
Ngaleso sikhathi umbuso wathi awunawo umazisi nencwadi yokuhambela amazwe kaTsautse. Wahabula nokuthi kungenzeka ukuthi uTsautse akasona isakhamuzi saseNingizimu Afrika
Wawufuna nolwazi ngamabhizinisi akhe nempahla anayo futhi sasingakatholakali isibhamu esasetshenziswa kubulawa bese kuvikelwa ofakazi.