USanele Mchunu ozobe ememezela amahhashi ngesiZulu namhlanje

UMA kukhulunywa ngezingqalabutho zabantu abamnyama kuleli nasemhlabeni jikelele, ngeke lasala ngaphandle igama lensizwa edabuka eMpophomeni, eHowick, uSanele Mchunu. Igama laleli qhawe libalwa emlandweni nelomgijimi wokuqala omnyama ukuwina iComrades Marathon uSam Tshabalala, uSiya Kolisi obengukaputeni wokuqala omnyama waMaBhokobhoko,uNobuhle wokuqala omnyama wakuleli, uJacqui Mofokeng, umculi wokuqala ukuwina i-Idols SA, uKhaya Mthethwa, uMengameli wokuqala wakuleli uDkt Nelson Mandela, uMengameli wokuqala wase-USA uMnuz Barrack Obama, nabanye abaningi.

USanele (41), osehlala KwaNyuswa, ePinetown, uqophe umlando ngokuba wumuntu wokuqala omnyama ukumemezela amahhashi ngesiZulu kumabonakude njengoba eqashwe uRace Coast. Le nsizwa isisemehlweni omhlaba nje, abakudala ababewasakaza nabangayitholanga le ngqayizivele yethuba lokusakaza kumabonakude ngoPhillip Bafana Zwane noShadrack Ngema kodwa abagcina emsakazweni wesiZulu osekuwuKhozi FM.

Engxoxweni ekhethekile neSolezwe Ngempelasonto, uSanele uthe le ngqayizivele yethuba iqhamuke nyakenye, ngesikhathi abeHollywood Bets bethatha isinqumo sokufukula umdlalo wamahhashi. Uthe wabe esephonselwa inselelo yokuba amemezele imijaho yamahhashi ngesiZulu, okuyinto ayengakaze wayiphupha. Nebala uSanele walibamba ngazo zombili leli thuba.

"Ngiqale ukumemezela imijaho nyakenye." Uthe kusukela lapho akabange esabheka emuva, njengoba ezozwakala nanamhlanje eqhuma phezulu kwiHollywoodbets Durban July eGreyville Racecourse eThekwini. USanele uthe uyafisa ukuba abantu abamnyama bande kulo mdlalo ngoba unamathuba emisebenzi eminingi ebebengavumelekile ukuba bayenze ngesikhathi sikahulumeni wobandlululo.

"Buka nje yize sesandile isibalo sojokhi emuva kokuwina kukaSmanga Khumalo okokuqala ngqa iDurban July, kodwa useyedwa umqeqeshi wamahhashi omnyama kuleli ekubeni le mboni inamathuba amaningi emisebenzi." Uthe sekufanele abantu abamnyama bangayi ezinkundleni okugijima kuzo amahhashi ngoba kuneDurban July kuphela kodwa kufanele bahlale bebekhona zimpelasonto zonke.

USanele uyindodana yesibili ebafaneni abathathu bakaMnuz Mvunyelwa Sokhela noNksz Jemina Mchunu. Waqala imfundo yakhe yamabanga aphansi KwaMqhathi Primary endaweni yaKwaMpande, eMgungundlovu. Udlulele eSt Lawrence Primary KwaNyuswa, ngaphambi kokuphothula uGrade 12 eKhabazela High, eMbo ngo-2000. Eseqedile esikoleni, uye eTechnikon Natal (osekuyiDurban University of Technology) lapho ephothule khona izifundo ZeVideo Technology.

Ngo-2006, uqashwe yiNhlangano yezokuSakaza kuleli (SABC) njengeVideo Editor. Ngo-2009, uthole amadlelo aluhlaza kwiSupersSport TV ngaphambi kokujoyina iGallop TV engaphansi kwe-e.tv lapho esasebenza khona njengeStudio Producer. Nakuba engakashadelwa kodwa uSanele usenabo abantwana abathathu.