UMENGAMELI wakuleli uMnuz Cyril Ramaphosa ushaye ingwiji ngemali eyafakwa yinkampani iBosasa kwiTrust Account yendodana yakhe u-Andile.
Uthe u-Andile ubekhokhelwa ngomsebenzi awenzela iBosasa.
NgoLwesihlanu uRamaphosa ukhiphe isitatimende esiqinisekisa ukuthi isikhulu esiphezulu sakwaBosasa, uMnuz
Gavin Watson safaka uR 500 000 kwiTrust Account ka-Andile ngoba kunomsebenzi ayewenzele inkampani.
Lokhu kuyashayisana nokushiwo uRamaphosa ngesikhathi ephendula incwadi ebithunyelwe uSomlomo wephalamende uNkk Baleka Mbete.
Encwadini uthe imali eyafakwa kwiTrust Account ka-Andile, yayingumnikelo wokuthi amkhankasele isikhundla sokuba ngumengameli we-ANC, futhi yayiqoqwe yindodana yakhe yena engazi.
Indaba yale mali eyakhokhelwa u-Andile ikhulunywe ephalamende ngeledlule, ngesikhathi umholi weDA uMnuz Mmusi Maimane ephonsa umbuzo kuRamaphosa ngayo.
I-EFF ithe kumele uMengameli Ramaphosa avume ukuthi uqambe amanga ephalamende ngoR500 000.
UMengameli we-EFF, uMnuz Julius Malema, uthe uRamaphosa uyazi naye ukuthi kwenzekani kumuntu oqamba amanga ephalamende.