Izindaba

Umphezulu ukhiphe izidumbu zababili uhlasela kwaNongoma

Simphiwe Ngubane|Published

SIKHIPHE izidumbu ezimbili isiphepho ebesihambisana nombani oshaye umuzi wangqongqa namalungu omndeni kwalimala nelinye ilungu eMahhashini, KwaNongoma, ngoLwesihlanu ntambama.

Imvula, ebihambisana nomoya onamandla liduma libaniza, isuse uphahla lwemizi yabantu yacekela phansi nempahla.

Kushone uNkk Kamgebe Rosha (65), umzukulu wakhe uSiyamthanda Rosha (10), kwalimala kanzima ingane kamufi, u-Aliviwe Rosha (14) ophuthunyiswe esibhedlela.

Kuthiwa umbani ushaye ikhona le ndlu wase ungena ngaphakathi washaya abashonile nolimele ngaphambi kokuthi ubhoboze udonga olungasemnyango.

Indlu ivele yangqongqa ngenhlanhla kwakhona ingane eneminyaka eyisishiyagalombili ekwazile ukuphuma yayohlaba umkhosi ngokwenzekile.

Isolezwe lihabule ukuthi mkhulu umonakalo odalwe yisiphepho ngasesikoleni iPhumzuzulu High okuthwalise kanzima amathimba abhekelele izinhlekelele.

UNgqongqoshe wezokuBusa ngokuBambisana neziNdaba zoMdabu, uMnuz Sipho Hlomuka, uthumele ithimba lezinhlekelele ukuba liyolekelela imindeni ekhahlamezekile futhi lihlole umonakalo odalekile KwaNongoma nasoLundi.

“Isiphepho sicekele phansi imizi eminingi KwaNongoma nasoLundi. Ithimba elibhekele izinhlekelele limatasa lihlanganisa umbiko ngomonakalo odalekile,” kusho uHlomuka.

Unxuse izakhamuzi ukuthi zihlale ziqaphile futhi zilandele izexwayiso zomnyango wakhe nezezangoma zesimo sezulu.

Kamuva umbani ubulale abantu abahlanu walimaza inqwaba ezingxenyeni ezehlukene KwaZulu-Natal.

Umnyango weluleke ngokuthi uma libaniza abantu abasemnyango abathole indawo yokukhosela ngokushesha kodwa kungabi ngaphansi kwesihlahla, ngaphansi kwezintambo zikagesi noma zezingcingo.

Abantu baxwayiswa ngokuthi bagweme ukuphumela phandle uma kunesiphepho, isichotho, noma kunezikhulula ukuze bagweme ukulimala.

Kumele bagweme ukusebenzisa imigwaqo namabhuloho, imifula egcwala kalula. Uma libaniza, abantu kumele bahlale endlini kude namawindi, bamboze izinto ezicwebezelayo futhi bacime izinto ezisebenzisa ugesi bakhiphe nalapho zixhunywe khona.