UNOBHALA jikelele we-ANC omisiwe, uMnuz Ace Magashule, usekhethe ukuwufaka enkantolo umdonsiswano ophakathi kwakhe nesigungu esiphezulu saleli qembu, esimyalele ukuthi makaxolise ngencwadi ayibhala, ethi umisa uMnuz Cyril Ramaphosa kwesobumengameli.
UMagashule wubenqunyelwe ugwayi katiki, kwathiwa lingashoni elanamhlanje engaxolisile kwi-ANC, kuRamaphosa nakubantu bakuleli ngencwadi okuthiwa kayikho emthethweni.
Kunokuthi axolise, uMagashule usekhethe ukuthatha elinye ugxathu ngokuphonsela inselelo ukumiswa kwakhe kwi-ANC, ngokunjalo nomgomo we-ANC wokuhoxiswa kwamalungu asezikhundleni, uma ebhekene namacala enkantolo.
Ngokwamaphepha asenkantolo aqukethwe yi-Independent Media, udaba luzongena enkantolo ngoJuni 1 nonyaka.
UMagashule ufuna ithathwe njengento engekho incwadi evela kwiphini lakhe, uNksz Jessie Duarte, ngokumiswa kwakhe nokuthi inkantolo ichithe umgomo wesigaba u-25.70 we-ANC.
UMagashule wamiswa emsebenzini emuva kokuba kuphele umnqamulajuqu wezinsuku ezingu-30, ayezinikeziwe nabanye abaholi be-ANC, ababhekene namacala, ukuba bashenxe ezikhundleni abakuzo .
UMagashule ubhekene necala lenkohlakalo, elithinta ithenda kaR230 million yokushintshwa kophahla lwezindlu ezifulelwe ngetsheboya eFree State. Ithenda yakhishwa ngesikhathi esengundunankulu kulesiya sifundazwe.