SABELO NSELE
IPHINI likasihlalo we-ANC KwaZulu-Natal uMnuz Mike Mabuyakhulu, uzokuba ngowokuqala kulesi sifundazwe ukuvela phambi kwekomiti lenhlangano elibhekele ukuziphatha kwamalungu, i-Intergrity Commission.
UMabuyakhulu kulindeleke ukuthi avele ngaphambi kwaleli komiti ngesonto elizayo kanti ngemva kwakhe kuyobe sekuvela amalungu angaphezu kuka-10 amagama awo avela ohlwini lwabanogcobho.
Lokhu kudalulwe nguNobhala we-ANC eKZN uMnuz Mdumiseni Ntuli, obekhuluma esithangamini nabezindaba ebesibizelwe ukuzocacisa ngezinqumo ezithathwe wumhlangano wesigungu esiphezulu esifundazweni ophethwe ngoMsombuluko.
UNtuli uthe uMabuyakhulu ukuqinisekisile ukuthi uzovela phambi kwaleli komiti eliholwa nguMnuz Sipho Magwaza, ngaphambi kokuphela kwesonto elizayo.
UMabuyakhulu uzovela phambi kwaleli komiti ngenxa yesinqumo esathathwa yisigungu esiphezulu se-ANC kuzwelonke sokuthi wonke amalungu ale nhlangano anamacala kumele ashenxe ezikhundleni bese ebhekana naleli komiti.
UNtuli uthe bekungakacaci ukuthi obeyimeya yaseThekwini uNkk Zandile Gumede uzovela nini.
UMabuyakhulu noGumede babhekene namacala enkohlakalo.
UNtuli uthe ohlwini lwabanogcobho kunamagama angaphezu kuka-10.
“Abaningi basolakala ngenkohlakalo, bese kuba yilabo abasolakala ngokubulala noma ngokwakha itulo lokubulala. Kukhona nabasolwa ngokweba izinto ezinjengemfuyo.
“Kukhona noyedwa osolwa ngokudlwengula. Iningi lamacala awango-2017 no-2018. Kukhona ababili abanecala lokuqhubeka nokuhola isibonelelo sikahulumeni ekubeni base bekhethiwe njengamakhansela. Bayazi ukuthi akuvumelekile ukuhola isibonelelo sikahulumeni uma uyikhansela kodwa bona baqhubeka.”
UNtuli uthe amalungu anogcobho aseThekwini, Okhahlamba, Newcastle nakwezinye izingxenye zesifundazwe.
“Sizophinde silulungise lo luhlu njengoba kwavela emhlanganweni wesigungu esiphezulu ukuthi kukhona amagama angekho,” kusho uNtuli.
Le nhlangano imemezele ukuthi seyaluvala uphenyo obeluvulelwe iPhini likaNobhala esifundazweni uMnuz Sipho Hlomuka, ilungu lesigungu esiphezulu uMnuz Jomo Sibiya noSihlalo we-ANC esifundeni eMalahleni uDkt Ntuthuko Mahlaba.
Bebephenywa kulandela ukusabalala kwencwadi eyayisola uSibiya ngowesifazane ayethandana naye, elekelelwa nguHlomuka noMahlaba.
Kuthiwa lona wasifazane ongalidalulanga igama lakhe kule ncwadi, uhlulekile ukuvela phambi kwekomiti ebeliholwa ngowayengundunankulu uMnuz Willies Mchunu.
UNtuli ubuye wagxeka ukuziphatha kwabebeyoxhasa uNkk Gumede ecaleni lenkohlakalo ngesonto eledlule.
Abalandeli bakaGumede babephethe izingqwembe ezigxeka abaholi be-ANC.
“Siyazi ukuthi kunesinqumo esathathwa yisigungu esiphezulu se-ANC ukuthi amalungu e-ANC angayi ezinkantolo ukuyokweseka amalungu anamacala.
“Mhlawumbe kufanele sikhulume noNkk Gumede. Ekuqaleni sathi uma sikhuluma naye ngale ndaba, wabaphika wathi akusibo abalandeli bakhe.
“Simbonile eyokhuluma kodwa wangazigxeka izenzo zabo,” kusho uNtuli.