WEHLULEKE nokuzibamba wasikhihla isililo owesifazane ohlala ehlathini eliseWestville, eThekwini, ebona kufika ungqongqoshe ezomnika usizo.
UNksz Bonisile Dlamini waseXobho, uhlala ehlathini nezingane zakhe ezinhlanu uThulebona Dlamini (17), indodana kamfowabo * -Andile Zulu (26), ekamzala uMbulelo Mdledle, indodakazi uDineo (10) nomzukulu uPrincess (5) abangafundi, okumele ngabe basesikoleni.
UNksz Dlamini wafika eThekwini ezosondelela ukuzobheka indodakazi eyayishayiswe yimoto uSne, eyagcina ishonile.
Esebuyela ekhaya, uthi wafika umuzi wakhe oseXobho ucekelwe phansi.
ISolezwe libike ngosizi lwalo mndeni ngeledlule njengoba selusukumise uNgqongqoshe wezeMfundo KwaZulu-Natal uMnuz Kwazi Mshengu noSihlalo wekomiti elibhekele ukuhlaliswa kwabantu kumasipala weTheku uMnuz Thanduxolo Sabela.
UMshengu obehamba nabahloli uthe ufuna izingane zakulo mndeni okuthiwa azikaze zilubhade esikoleni zingene ngonyaka ozayo.
“Ithimba labahloli lizocubungula uhlelo olukhona lwezemfundo lokuthi bangafakwa kumaphi amakilasi ikakhulukazi lo oneminyaka engu-10 ngoba uselahlekelwe yisikhathi esiningi. Lo oneminyaka ewu-17 owagcina kwaGrade2 sizomzamela izinhlelo zokuthuthukisa amakhono. Kungumsebenzi kahulumeni ukuthi uma uzwa ngesimo esehlisa isithunzi esinjengalesi usukume uyosilungisa. Ngiyethembisa ukuthi ngonyaka ozayo lezi zingane zizobe zifunda,” kusho uMshengu.
USabela uthe lo mndeni uzokwakhelwa umuzi ngokushesha, ngaphambi kokuthi wakhelwe umuzi uzotholelwa indlu ozoquba kuyo.
UNksz Dlamini oziphilisa ngokudayisa emgwaqweni, uthe akanayo imvume yokwenza lokhu ngezinye izikhathi uma amaphoyisa embambile amphuca izimpahla zakhe.
Ucele uSabela ukuba amsize ngemvume.
“Udaba lwezimvume zokudayisa luphethwe ngomunye umnyango okwamanje ngeke ngisho ukuthi kuzokwenzekani ngoba le ndawo odayisela kuyo anginalo ulwazi lokuthi kuvumelekile yini kodwa isicelo sakho ngizosidlulisela.”
UMfundisi Bheki Nxumalo obuye afundise eNyuvesi yaKwaZulu-Natal, uthe waqala ukubona lo mndeni ngePhasika ethi ubezama ukuxhumana nomasipala weTheku kwanhlanga zimuka nomoya.
Uzame ukutholela izingane isikole, eziningi zanqaba ukwamukela lezi zingane wathi ezinye zikude nehlathi elihlala lo mndeni.