IZOGUGELA ejele indoda egwetshwe odilikajele ababili neminyaka ewu-14 ngecala lokudubula ibulale abasekhweni layo.
UMzwandile Mlambo (40) ugwetshwe yiNkantolo yesiFunda eMzimkhulu ngokubulala umukhwe wakhe, uMnuz Shumilakhe Tenza (61) nomkhwekazi uNkk Nontuthuko Tenza (60).
UMlambo ugwetshwe udilikajele ngecala ngalinye lokubulala, iminyaka eyisikhombisa ngokweba isibhamu neminye eyisikhombisa ngokutholakala nezinhlamvu ezingekho emthethweni.
Okhulumela amaphoyisa KwaZulu-Natal, uColonel Thembeka Mbele, uthe ngo-Ephreli 15, 2017 uTenza nomkakhe babulawa besemzini wabo eNazareth, eMzimkhulu, ngenkathi behlaselwa nguMlambo.
“Kwadutshulwa ngewindi izinhlamvu zashaya abagilwa ekhanda nasesiswini. Bobabili bashona ngenxa yalokhu kudutshulwa. Kwabe sekuvulwa amacala okubulala esiteshini samaphoyisa saseMzimkhulu,” kuchaza uColonel Mbele.
UColonel uthe ngumphenyi wecala owahlanganisa ubufakazi obaholela ekuboshweni kukaMlambo owayesekubhaceni khona eMzimkhulu.
“Watholwa nezinhlamvu ezinhlanu ngenkathi eboshwa. Ngokuqhubeka kophenyo, kwatholakala ukuthi ubulale abasekhweni lakhe. Kwavela nokuthi isibhamu esasetshenziswa sasikade sintshontshwe ngo-Ephreli 13, 2017. Uvele ephindelela enkantolo kwaze kwaba uyagwetshwa,” kusho uColonel Mbele. Kusolwa ukuthi uMlambo weba isibhamu sikayise agcina edubula ngaso.
UKhomishana wamaPhoyisa KwaZulu-Natal, uLieutenant General Khombinkosi Jula, usamukele isigwebo esinikwe uMlambo.
“Siyethemba isigwebo sizowududuza umndeni,” kusho uJula.