UGWETSHWE iminyaka engu-22 ebhadla ejele owesifazane ozivumele ngokwakhe enkantolo ukuthi wathengela umyeni wakhe owayeyiphoyisa izinkabi ezamgwaza zambulala ukuze athole ifa.
UNonkululeko Ngwabe (46) ugwetshwe ngoMsombuluko iNkantolo eNkulu eMgungundlovu.
Uvume icala lokubulala umyeni wakhe uWarrant Officer Thulani Ngwabe (51) isidumbu sakhe esatholakala ngoNovemba 3, 2019 sinamanxeba amaningi okugwazwa.
Satholwa eduze kukajantshi wesitimela ngasolwandle ePort Shepstone.
UNgwabe wayesebenza ophikweni oluphenya amacala omndeni, awokuvikelwa kwezingane nathinta ucansi eMargate.
Okhulumela oKlebe KwaZulu-Natal, uCaptain Simphiwe Mhlongo, uthe uphenyo lwalolu phiko ePort Shepstone, lwaholela ekuboshweni kwalo wesifazane ngoDisemba 2019.
Kuthiwa ukuboshwa kwakhe kwenza wakhipha amadoda amathathu okusolakala ukuthi wawaqasha okungoMnuz Sthembiso Mbona (25), Nhlakanipho Ndovela (23) noMnuz Saziso Khambule (25).
“La madoda aboshwa eMurchison ngoDisemba 2019 abekwa icala lokubulala. Avela onke eNkantolo yeMantshi ePort Shepstone icala ladluliselwa eNkantolo eNkulu eMgungundlovu,” kusho uMhlongo.
Abasolwa bebelokhe begqunywe ngaphakathi ezikhindini ezimnyama njengoba benqatshelwe ibheyili.
UMhlongo uthe ngoMsombuluko lona wesifazane uvele wagonyuluka ngakho konke okwenzeka etshela ijaji ukuthi wabulala ngoba ebheke imali yefa yomyeni wakhe.
Kuthiwa emva kokuvuma lokhu, ijaji kalichithanga sikhathi labe selimgixabeza ngesigwebo.
UMhlongo uthe inkantolo ibe isikuhlehlisela uJuni 18 nonyaka ukulalelwa kwecala lala madoda amathathu asolwa ngokuba yizinkabi.