UGumbi uzohlonishwa ngomngcwabo kahulumeni

UZOHLONISHWA ngomngcwabo osezingeni likahulumeni umfundisi owazakhela udumo emsakazweni kuKhozi FM, uDkt Simon Dingane "SD" Gumbi, emuva kwenkonzo ezokuba seStanderton Showgrounds, eMpumalanga, ngoLwesibili kusukela ngo-9 ekuseni.

Ngokusho kwelungu lomndeni elingavumelekile ukukhuluma nabezindaba, uGumbi uzofihlwa ngokwesigaba sesibili. Ngaphambi kokuba afihlwe kuzoba nohide lwezinkonzo. Kusukela namuhla kuze kube wuLwesine ngo-6 kuya ku-8 ebusuku kuzokuba nemithandazo. NgoLwesihlanu  kuzokuba nenkonzo yesikhumbuzo ngo-3 ntambama e-Assemblies of God, eStanderton.

NgoMgqibelo kuzophinde kube nenkonzo yesikhumbuzo emzini kaGumbi oseStanderton ngo-3 ntambama bese ngeSonto ebandleni likaMbhishophi Mkhwane iChurch Combined Spiritual Feast & U-"Amen Usekhona" kube nenkonzo yesikhumbuzo ngo-3 ntambama. NgoMsombuluko kuzophinde kube nomthandazo ohambisana nomlindelo phakathi kuka-6 no-8 ebusuku. 

UGumbi (66), owazakhela udumo ohlelweni loKhozi FM UNkulunkulu Nomuntu Omusha futhi edume ngombuzo othi "Usekhona u-Amen?", udlule emhlabeni ngoMsombuluko, ngezithuba zabo-8.30 ebusuku. Izindaba zokushona kwaleli qhawe kwezenkolo zimenyezelwe ngozibize ngendodana kaGumbi, uMfu Nhlapho. Uthe ukufa kumenele uGumbi emuva kokugula isikhathi eside. Uhamba nje uGumbi  ubesehamba ngesihlalo esinamasondo emuva kokunqanyulwa umlenze wangakwesokudla. 

Kwabadlulise induduzo, kubalwa abamaCrown Gospel Music Awards neWorld Gospel Powerhouse, umculi uSipho Makhabane, indlovukazi yomculo wokholo, uDkt Rebecca Malope, uThinah Zungu, uBenjamin Dube nabefundisi bamabandla ahlukahlukene nezinhlangano. Kuze kwashaya isikhathi sokushicilela kungakatholakali okuningi ngoGumbi.