Udilika kowabulala owaseDUT ngesando

UGWETSHWE udilikajele eNkantolo eNkulu yaseMgungundlovu owesilisa ona-29 owayefunda eDurban University of Technology (DUT) owashiya izifundo wayoba yisigebengu.

UMsizi Mbutho ugwetshwe ngecala lokubulala isitshudeni uSandile Ndhlovu (18), obenza unyaka wokuqala kwi-Industrial Engineering kusona lesi sikhungo. Umufi wayefunda ophikweni lwaseSteve Biko, eThekwini ngoSepthemba 9, lapho ashaywa khona ekhanda ngesando ngaphambi kokuthi abanjwe inkunzi.

Likhipha isigwebo, iJaji uKhosi Hadebe, lithe akusaphephile kunoma yisiphi isikhungo semfundo “kusuka esikoleni samabanga aphansi kuze kufike emanyuvesi”.

Ekhuluma ngaphandle kwenkantolo sekukhishwe isigwebo, uyise kamufi, uMnuz Sibusiso Ndhlovu (45) uthe bachitha izinsuku ezingu-10 eceleni kombhede kaSandile e-ICU bethandazela isimangaliso.

“Satshelwa ngoSepthemba 10, ukuthi ingqondo yakhe ngeke isaphinde isebenze futhi salulekwa ukuba simkhiphe emishinini emgcine ephila. Sacela isikhathi esengeziwe futhi sathandazela ukuthi alulame ekulimaleni ekhanda. Ngangingakholwa ukuthi ukuphela kwengane esasinayo ayisekho. Manje ngibona sengathi akukho okungikhuthaza ukuthi ngiye emsebenzini ngoba ngisebenze kanzima ukuqinisekisa ikusasa eliqhakazile kuye,” kusho uNdhlovu.

Into eyayinzima kakhulu kuye kwakuyilapho indodana yakhe ingasabizwa ngegama layo kodwa ikhonjwa ngenombolo, idluliswa isuka kwamanye amakhaza iyiswa kwamanye.

“Usuku lo mame, usuku lobaba noKhisimusi ngeke kusaphinde kufane ngaphandle kwakhe.”

Lo mndeni, odabuka eMpumalanga, kaweneme ngalesi sigwebo, ngoba uthi ngeke siyibuyise indodana. Yize kunjalo kodwa ukhululekile ngokuthi icala lifinyelele emaphethelweni.

UMbutho, odabuka eClermont, obephume ngoshwele ejele ngamacala okugqekeza izindlu ngo-2014, waya eDUT wahlasela umufi kabili ngesando weba iselula yakhe ne-laptop.

Inkantolo izwe ukuthi wake waba ngumfundi oqavile, owaqeda * -matric ngamalengiso, waya eDUT ukuyokwenza izifundo zeSocial Science kodwa wazishiya ngemuva kokuba sengozini yemoto lapho aphuka imilenze yomibili. Walulama ngokuphelele, yilapho-ke aqala khona ubugebengu

Ngeledlule uMbutho uvume icala lokubulala uSandile. Encwadini yokuvuma icala, efundwe ngummeli wakhe * -Irshad Khan, uMbutho uthe waya eDUT eyontshontsha “noma yiziphi izinto ezikhala kahle”.

“Ngikwenze lokhu ngenxa yokuphelelwa yithemba ngoba ngingasebenzi, ngingenamali futhi ngingenamathemba omsebenzi ongangingenisela imali,” kusho incwadi yakhe.

UKhan ucele inkantolo icubungule isimo sikaMbutho, ibheke ukushonelwa uyise esafunda kanti unina washona ngonyaka wakhe wokuqala efunda eDUT.

Ummeli woMbuso, uMnuz Bonginkosi Mbokazi, ukuchithile lokhu wathi uMbutho wanikezwa ithuba lesibili empilweni ngenkathi enikwa ushwele emuva kokugwetshwa ngaphambilini.

“Uneminyaka engu-29, ufundile futhi uhlakaniphile. Kwakufanele azi kangcono.

Irekhodi lakhe lezemfundo likhombisa ukuthi uhlakaniphile ngokwanele ukuthi azi ukuthi lokho akwenzile bekungalungile.”

Uthe isenzo sikaMbutho asithetheleleki futhi akekho umzali okufanele adlule kulokhu abazali bakaSandile abadlule kukho.

UMnuz Alan Khan, okhulumela iDUT, uthe bakhululekile ukuthi ubulungiswa benziwe nokuthi uMbutho utholwe enecala lokuhlasela okunobudlova ngakwenza kuSandile.

“Yize sazi ukuthi lokhu ngeke kumbuyise uSandile, siyethemba ukuthi umndeni wakhe, abangani nalabo abefunda nabo bazoduduzwa wulwazi lokuthi umsolwa ubanjiwe, wagwetshwa ngempumelelo futhi wagwetshwa ngokufanele ngokuhlasela okunonya. Sengathi umphefumulo kaSandile ungaphumula ngokuthula,” kusho uKhan.