UNGQONGQOSHE wamaPhoyisa kuleli uMnuz Bheki Cele, uthi bazothatha izinyathelo ezifanele uma sekubuya imiphumela mayelana nokudutshulwa kowesifazane, okusolwa ukuthi wadutshulwa ngamaphoyisa ayejaha izigebengu.
Izolo, uCele ehambisana nezinye izikhulu uvakashele umndeni kaNksz Samantha Radebe (29) e-Alexandra, eGoli, eyobhonga emswaneni.
Umufi wadutshulwa ngoLwesithathu ngeledlule eseduze kwakubo.
Umufi kukholeka ukuthi wadutshulwa yinhlamvu eyayindiza emoyeni kudubulana amaphoyisa nezigebengu.
Izinsolo zithi inhlamvu eyamdubula kwakungeyamaphoyisa, lokhu kakukaqinisekiswa njengoba uphenyo lokucubungula izinhlamvu ezasetshenziswa esigamekweni lusaqhubeka.
UCele ekhuluma bukhoma kwi-eNCA uthe uma kubuya imiphumelo yokuhlolwa kwezinhlamvu bazobe sebethatha izinyathelo bewumbutho.
“Uma sekubuye imiphumela esichazela kahle ukuthi kwenzakani sobe sesithatha izinyathelo ezifanele.
Uma kutholwa ukuthi inhlamvu yamaphoyisa edubulile i-Ipid sobe sesiyidedela ukuba iphenye. Uma kuyizigebengu, amaphoyisa azoqhubeka nophenyo.
Okwenze size lapha namhlanje (izolo), ngaphandle kokuzoduduza umndeni, wukuba sizoqinisa ubudlelwane phakathi komphakathi namaphoyisa. Ngoba uma sesingasakwazi ukusebenzisana nomphakathi, kuzovuleka igebe phakathi kwamaphoyisa nawo (umphakathi), bese ubugebengu buyaxaka kule ndawo, okuyinto esingafuni ukuba yenzeke,” kusho uCele.
Khonamanjalo uNgqongqoshe wezeMfundo eGauteng, uMnuz Panyaza Lesufi, izolo ubevakashele umndeni womfundi ominze esesikoleni.
UKeamohetswe Seboko (13), utholwe kwi-swimming pool yalapho kuhlala khona abafundi besikole eLaerskool Bekker, eMagaliesburg.
ULesufi ekhuluma kwi-eNCA, uthe usekhathele wukulokhu evakashela amakhaya abafundi ezokhala, engabe uhambela amakilasi ebheka ukufunda kwezingane.