ZIMKHALELE owesifazane (20) waKwaMashu osolwa ngokulahla usana emgqomeni esibhedlela, iKing Edward VIII.
Ngokwesitatimende esikhishwe ngumnyango wezempilo KwaZulu-Natal, unina wengane ubegcinwe wumhlengikazi eyincelisa ngoLwesine. Umhlengikazi uphume eya kwelinye iwadi emushiya nayo.
Ingane yomfana ibizalwe ngenyanga yesishiyagalombili ishaya u-1.2 kg. Beyigcinwe ebhodleleni esibhedlela.
Kuthiwa unina wengane uyigoqe ngopulastiki ofakwa embhedeni wase eyifaka kwipillow case wayibopha wase eyifaka emgqomeni wabeka amaphepha ngaphezulu.
Umhlengikazi eseyibuza ingane kunina uzenze ongayazi.
Ingane ize yatholakala emgqonyeni, inezimpawu zokuncisheka umoya. Kubizwe udokotela wayisiza.
Kuthiwa ibisemgqonyeni okulahlwa kuwo izinayiti nezinye izinto. Bekufanele ikhishwe ngosuku olulandelayo.
Owamaphoyisa uLt Col Thulani Zwane ukuqinisekisile ukuthi amaphoyisa ambophile unina wengane ambeka icala lokuzama ukubulala. Kuthiwa ubebelethele kwesinye sezibhedlela zaseThekwini.
Kulindeleke avele enkantolo yemantshi eThekwini namuhla.
Kusanda kutholakala usana lulahlwe esitamkokweni eNewlands East.
FUNDA: Imeya nekhwelo lokunikela ngezingane
UNgqongqoshe wezeMpilo kulesi sifundazwe uDkt Sibongiseni Dhlomo ubonge abahlengikazi ngokuthungatha ingane basindisa impilo yayo.
“Lesi yisigameko sesibili esikhathini esingangesonto kulesi sifundazwe. Siyajabula ukuthi zombili izingane ziyaphila. Ngalolu lwazi esinalo oluncane unina wengane (etholakale esibhedlela) onenye ingane ubedonswe ngendlebe yisoka lakhe nanguyise ngokuthi angalinge abuye nengane.
Uthe abantu kufanele bazi ukuthi zikhona izinhlelo ezingasiza abantu besifazane abangakulungele ukuthola abantwana njengezivikelanzalo nezinhlelo zokukhipha izisu eziphephile.