Ubonga uNkulunkulu ngokuteta ngempumelelo

IGAMA lakhe nguZinhle Mabena, usezakhele igama endimeni yezokulingisa. Useke wabonakala emidlalweni emikhulu okubalwa Isibaya, House of Zwide, nosanda kuphela Isifiso. Ngokuzalwa ungowase-East Rand, eGauteng. UNKOSIKHONA CELE uxoxisane naye kabanzi ngezindaba zenkolo.

NC: Ngabe likhona ibandla okhonza kulona?

ZM: Ngiyilungu lokuqina lebandla, iChange Bible Church. Sengibe kuleli bandla iminyaka eyisishiyagalolunye egcwele.

NC: Ngabe sikhona isimo esinzima osuke wabhekana naso empilweni yakho kodwa obonga uNkulunkulu ngokukulonda ngesikhathi ubhekene naso? Uma sikhona yisiphi futhi kwakwenze njani?

ZM: Yebo, mina ngiyambonga uNkulunkulu ngokuthi sekuze kwaba yikabili ngiteta ngempumelelo. Phela ukuteta akusiwona umdlalo. UNkulunkulu emuhle ngiyambonga kakhulu ngoba namanje ngisadla anhlamvana.

NC: Ngabe yiziphi izinto ezimbili onazo ezidala ukuthi umbonge njalo uNkulunkulu?

ZM: Okukuqala, ngithanda ukumbonga kakhulu uNkulunkulu ngesipho sempilo angibusise ngaso. Okwesibili, ngithanda ukumbonga uNkulunkulu ngamathuba okulingisa angibusisa ngawo.

NC: Eminyakeni emihlanu ezayo kumbe eyishumi yini eyodwa okhulekela ukuthi uNkulunkulu akubusise ngayo? Leyonto isho ukuthini empilweni yakho?

ZM: Ngikhulekela ukuthi uNkulunkulu angibusise ngidlondlobale kakhulu kwezokulingisa. Ngikhulekela nokuthi ngibe namandla okusungula inkampani yami yezokukhangisa.

NC: Ngabe likhona ivesi okholelwa kakhulu kulona uma likhona yiliphi futhi lisho ukuthini?

ZM: Ngithanda kakhulu incwadi esebhayibhelini etholakala kumaHubo ethi “Ungesabi ngoba mina nginguNkulunkulu”. Leli vesi linginikeza amandla nokuqonda ukuthi uNkulunkulu uzonginikeza konke engikucelayo kodwa lokho uzokwenza ngesikhathi esifanele.

NC: Ngabe ungumuntu okholelwa kangakanani emandleni omkhuleko futhi usho ukuthini kuwena?

ZM: Umkhuleko kimina uyikho konke, akukho nokukodwa engiye ngiqale ukukwenza ngingazange ngiqale ngomthandazo.