Ubonga uNkulunkulu ngokudlondlobala emculweni
USENZO Khumalo
NC : NGABE likhona ibandla okhonza kulona uma likhona yini ekuchazayo ngalo?
SK : Ngikhule ngikhonza ebandleni laseZayoni kodwa manje njengoba sengiseGoli sengiyilungu lebandla labasindisiwe iChrist Embasy.
NC : Ngabe likhona ivesi elilotshwe embhalweni oNgcwele elikugqugquzelayo futhi lisho ukuthini empilweni yakho?
SK : Litholakala kwabaseKorinte likhuluma ngokuthi ngingenza konke ngamandla uNkulunkulu angiphe wona. Liyangigqugquzela ngaso sonke isikhathi uma kukhona izimo ezinzima engibhekene nazo.
NC : UMA ubheka impilo yakho ngeso elijulile ngabe yiziphi izinto ezimbili ongathi zidala ukuthi umbonge kakhulu uNkulunkulu?
SK : Okokuqala ngithanda ukumbonga kakhulu uNkulunkulu ngesipho sokucula angiphe sona esenza ukuthi ngikwazi ukuziphilisa. Okwesibili ngiyambonga ngesipho nje sempilo ngikholwa ukuthi sinamandla kakhulu.
NC : NGABE ungumuntu okholelwa kangakanani emandleni omkhuleko futhi kuwena usho ukuthini?
SK : Kimina umkhuleko uyisikhali esimqoka kunazo zonke, yinto engiyazisayo ngoba ngikholwa ukuthi iyangisebenzela. Ngiwubonile ungenzela izinto ezinkulu empilweni yami.
NC : EMINYAKENI emihlanu kumbe ke eyishumi ezayo ngabe yini okhulekela ukuthi uNkulunkulu akubusise ngayo empilweni yakho futhi leyonto isho ukuthi kuwena?
SK : Ngikhulekela ukuthi uNkulunkulu abe nami umculo wami udlondlobale ngize ngigcine sengaziwa nakwamanye amazwe. Emuhle uNkulunkulu ngiyazi ukuthi lokho kuzokwenzeka.
NC : NGABE sikhona isimo esinzima kakhulu osuke wabhekana naso empilweni yakho? Uma sikhona kwakwenze njani futhi umbonga kangakanani uNkulunkulu ngokukuhlenga ngesikhathi usabhekene naso?
SK : Ngiyohlale ngimdumisa futhi ngimbonga uNkulunkulu ngokuba nami ngesikhathi iCovid 19 idla lubi. Ngibonga ukuthi wangigcina ngaphila yize yayingekho imali engenayo ngenxa yokuthi yayingekho imicimbi esasiyihambela.
NC : Ngabe yini into ewumusa ongathi uNkulunkulu ukwenzele yona?
SK : Kuwumusa omkhulu ukuthi ngiyakwazi ukubhalela nabanye abaculi izingoma. Lokho angikuthathi kancane.