INGWAZI ye-rap uJabulani Tsambo, obedume ngelikaHip Hop Pantsula (HHP), ivalelise nge-albhamu yayo yokugcina kubalandeli bayo esihloko sithi, It Feels Good To Be Back.
Omunye wezikhulu zenkampani obesekuqopha kuyo uHHP, i-Universal Music South Africa, uMatwetwe Ntombini, uthe i-albhamu yalo mculi idedelwe ngesonto eledlule kuma-iTunes.
“Angikwazi ukusho ukuthi akuzophazamiseka yini ukuphushwa kwayo njengoba engasekho ngenxa yokuthi angikho kulolo phiko olibhekene nalokho.”
Leli cwecwe elalizobizwa ngesihloko esithi, The Drum kwakufanele liphume ngoJuni 16 kulo nyaka kangangoba waze wabhala nasezinkundleni zokuxhumana, ejabule.
“Sekusemthethweni. Sengisayine isivumelwano ne-UMGSA #DrumThe Album June 16, icwecwe lokugcina...” kodwa kwagcina kungenzekanga. Ubezozibiza ngegama likaJabba X.
U-HHP (38), wodumo lwengoma ethi Harambe nethi Bosso Ke Mang, ushone izolo ngezithuba zabo 12 emini.
Yize obengumsabalalisi wezindaba zakhe uLerato Sengadi nobebhekene nokubhukhwa kwakhe, u-Ofentse Mothusi bekuqinisekisile emithonjeni yezindaba ukuthi lo mculi akasekho kodwa abachazanga ukuthi ushonelephi nokuthi ubedliwa yini.
Lo mculi ubesanda kubhala ku-Instagram ukuthi ukhumbule umrepha ongasekho uFlabba weSkwatta Kamp njengoba bekuwusuku lwakhe lokuzalwa ngo-Okthoba 17.
Kwenzeka lokhu nje lo mculi uke wadalula ukuthi ngo-2015 wazama amahlandla amathathu ukuzibulala kodwa wabuye wazikhuza ngenxa yesifo sokhwantalala.
Ekhuluma nomsakazi weCliffcentral.com uGareth Cliff, uHHP wadalula ukuthi unyaka ka-2015 wawumubi kakhulu kuye. Ngemuva kokubonana nomelaphi wendabuko, wazithola esezigxinxa ngamaphilisi kodwa wangalapheka esifweni esasimphethe. Wathi kwaze kwaba kabili ezama ukuzibulala ngengozi yemoto nangegesi esemotweni.
Izolo ntambama umndeni kaHHP ukhiphe isitatimende uqinisekisa izindaba zokudlula kwale nsizwa. Awucacisanga ngokuthathe lo mculi.
Kodwa okubalulwe ilesi sitatimende ukuthi ushiye abazali bakhe, unkosikazi, indodana nodadewabo ababili.