SIGOQA ISONTO: Sebezomelwa wummeli oyedwa abahlanu kwelika-AKA no-Tibz

OWAYEYIBAMBA lo mqondisi wophiko lwezokushushisa KwaZulu-Natal u-Adv Simphiwe Mlotshwa, usezomela bonke abalisa abahlanu abasolwa ecaleni lokubulawa kowayeyintandokazi yomrepha wakuleli zwe uKiernan Forbes, owayaziwa ngelika-AKA, nomngani wakhe owayewumpheki nosomabhizinisi odumile uTebello 'Tibz' Motsoane.

Lokho kudalulwe yisekela lo mqondisi wophiko lwezokushushisa u-Adv Lawrence Gcaba, ngenkathi kubuye leli cala eNkantolo ePhakeme yaseThekwini, kulandela ukuthi mhla ligcina ukuhlala ngoFebhuwari, kwakumenyezelwe ukuthi liyasuka eNkantolo yeMantshi.

UMlotshwa uzomela laba basolwa okungoMnuz Lindokuhle Thabani Mkhwanazi, Lindani Zenzele Ndimane, Siyanda Eddie Myeza, Mziwethemba Harvey Gwabeni noLindokuhle Lindo Ndimane, abavele kafushane enkantolo.

Icala lihlehliselwe uJuni 12, ukuzoqhuba amalungiselelo okuqulwa kwalo.

Ngaphambi kwalokhu, uMlotshwa ubemele uMkhwanazi noNdimande (Lindokuhle) kuphela, kuthi uMyeza yena wayemelwe uNkk Yolanda Gielink, bese kuthi uGwabeni noNdimande (Lindani) bona bebemelwe wuMnuz Joe Wolmarans.

Laba balisa basolwa isigameko sokudutshulwa, kwafa u-AKA noTibs bengaphandle kwendawo yokudlela iWish, esemgwaqweni uFlorida, eThekwini ngoFebhuwari 10, 2023. Babekwe amacala amabili okubulala, elokuhlela itulo lokubulala, amahlanu okuzama ukubulala, amabili okutholakala nezibhamu nezinhlamvu okungekho emthethweni.

UGcaba utshele inkantolo ukuthi ummeli uMnuz Sibusiso Dlamini, wuyena ozomela abasolwa, bese kuthi u-Adv Mlotshwa athathe imiyalelo kuyena. Uveze nokuthi bavumelene ngokuthi leli cala lihlehliswa ngenxa yokuthi uMlotshwa kudingeke ukuthi aye eSwatini, lapho okuqhubeka khona ukulalelwa kwesicelo sokuthi kubuyiswe kuleli zwe abanye abasolwa ababili abasolwa kuleli cala oMnuz Siyabonga Gezani Ndimande noMalusi Dave Ndimande, abavalelwe kuleliya lizwe.

Umbuso waveza ukuthi uGwabeni walandela u-AKA nethimba ayehamba nalo besuka esikhumulweni sezindiza iKing Shaka, kwaze kwaba bafika ehhotela ababezolala kulona eMhlanga, eThekwini. 

Kuzokhumbuleka ukuthi ngenkathi uGwabeni ezama ukufaka isicelo sebheyili kabusha, u-Adv Gcaba wamphikisa ngalokho, emnqoba ngokuthi banabo ubufakazi obuveza okwenzeka esikhumulweni sezindiza, nokuthi umbuso waveza izinsolo zokuthi uNdimande (Lindokuhle) wayekhona eWish ngesikhathi u-AKA esahleli ngaphakathi, wakhetha ukuhlala ngalapho ayezokwazi ukubona khona yonke iminyakazo ka-AKA nethimba ayehamba nalo.

Umbuso wathi uNdimande wayelokhu ematasa ocingweni ebe edla, amehlo akhe engasuki nhlobo ku-AKA, okwathi ngenkathi sekudutshulwana ngaphandle, yena wasala ngaphakathi endaweni yokudlela, futhi wayengathukile nhlobo njengabanye.