SELUFAKWE enkantolo udaba lwamalungu omndeni aseLovu, asolwa ngokulothisa isidumbu sikanina amanye engazi. Lawa malungu asesolwa nangokuhlukumeza uyise onokukhubazeka, okhiyelwe endlini ngoMsombuluko.
Amalungu omndeni kaNkk Ntombiyomhlaba Shelembe (68), izolo anikele eNkantolo yeMantshi eMbumbulu ukuyomangalela amanye amalungu abehlala nomufi.
UNkk Shelembe washonela kwakhe eLovu ngoJuni 3, kanti kusolwa ukuthi walothishwa ngoLwesithathu olwedlule ngamadodakazi akhe, umndeni ungazi.
UNkk Zanele Mkhize ongomunye wamadodakazi kamufi, uthe inkantolo ibanikeze incwadi okumele isayinwe ngamalungu omndeni asolwa ngokulothisa unina.
“Sitshelwe ukuthi kumele le ncwadi siyinike amaphoyisa okuyiwona okumele asayinise udadewethu osolwayo. Incwadi ibhalwe ukuthi kumele avele eNkantolo ngoJulayi 30 eMbumbulu. Sesilinde ukuthi siyocela amaphoyisa asiphelezele ayosayina incwadi,” echaza.
Kuzobe kungaqali ukufika amaphoyisa emzini kamufi njengoba ngoMsombuluko kuze kwabizwa wona ngesikhathi amalungu omndeni asolwayo ezikhiyele endlini.
Bekufike amanye amalungu omndeni kamufi abefuna ukuzwa ukuthi kwenzekeni ngesidumbu sakhe njengoba ebengekho elothiswa. Isolezwe belikhona kugasele lawa malungu omndeni, enye yamadodakazi kamufi asolwayo yanqaba ukukhuluma.
Umyeni kamufi uMnuz Mdoda Shelembe (77) ongakwazi ukuhamba, naye ukhiyelwe endlini kusukela ngezithuba zabo 1 emini kwaze kwashaya * -5 ntambama.
UNkk Mkhize uthe babize amaphoyisa ngoMsombuluko ngoba befuna angenelele kodwa udadewabo wanqaba ukuvula.
Izolo uNkk Mkhize namanye amalungu omndeni aye kosonhlalakahle ukuyobika ngodaba lokukhiyelwa kukayise.
Kulindeleke ukuthi osonhlalakahle bayobheka isimo sikaShelembe lingakapheli isonto. Omunye wamadodakazi abehlala nomufi uNksz Zinhle Shelembe, ngoMsombuluko ukuqinisekisile ukuthi ulothisiwe unina.
Uthe banqume ukumlothisa njengesifiso sakhe.
Kwenzeka lokhu nje amanye amalungu omndeni abehlele ukuthi angcwatshwe ngoMgqibelo odlule.
Kuthiwa omakhelwane abebezolindela ngoLwesihlanu, baphindele emuva bethola ukuthi awusekho umngcwabo.
UNksz Shelembe ovumile ukuthi bese kuvunyelwene ngokuthi umufi angcwatshwe ngempelasonto edlule, uthe banquma ukumlothisa ngoba abanye odadewabo abafikanga ukuzoqhubeka namalungiselelo omngcwabo.
UShelembe, Isolezwe elingakwazanga ukukhuluma naye ngenxa yokukhiyelwa, kuthiwa naye akavumanga ukuthi umkakhe alothiswe.