LUQALE ngegiya eliphezulu uhlelo lokugonywa kwamaphoyisa KwaZulu-Natal izolo ekuseni njengoba kugonywe angu-500 ngosuku lokuqala.
Lolu hlelo lwethulwe esiteshini samaphoyisa, iDurban Central, yiPhini likaKhomishana wamaPhoyisa eKZN, uMajor General Phindile Radebe, obe ngowokuqala ukugonywa.
Luzonabela kuzo zonke izifunda ezingu-11 okulindeleke ukuthi kugonywe amaphoyisa abalelwa ku-30 000. Isifunda ngasinye sizoba nendawo eyodwa yokugoma amaphoyisa ngaphandle kwaseThekwini ezoba nezimbili ngenxa yesibalo esiningi sawo.
Kuzogonywa nama-reservist, onogada, ama-intern, abasebenzi basezindlini abahlanza izindawo okusebenzela kuzo amaphoyisa namaphoyisa aqhamuka kwezinye izifundazwe ajutshwe eKZN.
Kubekwe eqhulwini ukugonywa kwamaphoyisa aneminyaka engu-60 nangaphezulu, anezifo ezingamahlalakhona nalawo umsebenzi wawo owabeka engcupheni yokusuleleka kalula ngeCorona.
Ngeke agonywe amaphoyisa asuleleke ngeCovid-19 esikhathini esiyizinsuku ezingu-30 ezidlule, adla imishanguzo yokuthithibalisa umkhuhlane ezinsukwini ezingu-14 nalawo asegonyiwe.
U-Major-General Radebe ukhombise ukuluthakasela lolu hlelo okuyinto ebonakale ngesikhathi exoxa namaphoyisa abemi ujenge lwabazogonywa.
“Ukugomela iCovid-19 iyona ndlela yokuzivikela kuleli gciwane elibulalayo futhi siyajabula ukuthi lolu hlelo seluqaliwe esifundazweni. Sinethemba lokuthi abasebenzi bethu bazolisebenzisa ithuba lokugoma njengoba siqhubeka nokulwa nalolu bhubhane eKZN,” usho kanje.
Uqhube wathi bazoqhubeka bafundise amalungu abo ngokubaluleka kokugoma, wanxenxa abaphathi bamaphoyisa kuzona zonke izigaba ukuthi bakhuthaze amaphoyisa ukuba alisebenzise leli thuba, angabi manqika.