Sandile isibalo samaphoyisa agijima iComrades Marathon
AMAPHOYISA azobe eyingxenye yomjaho iComrades Marathon esuka eMgungundlovu iphethwe eThekwini ngeSonto
Image: Sithunyelwe
UKHOMISHANA wamaPhoyisa, uGeneral Fannie Masemola, uwafisele okuhle amaphoyisa azobe eyingxenye yomjaho iComrades Marathon, esuka eMgungundlovu iphelele eThekwini ngeSonto.
UMasemola uthe angu-437 amaphoyisa azobe eyingxenye yalo mjaho ka-98.
"Kulawa maphoyisa angu-66 awesifazane, angu-371 awesilisa. Asuka kuzona zonke izifundazwe kanti azobe eyingxenye yabangu-22 000 abazongenela umjaho."
Uthe ukungenela kwamaphoyisa lo mjaho kufakazela into abahlale beyisho yokuwagqugquzela ukuthi ahlale ephilile.
'Minyaka yonke siyakhula isibalo samaphoyisa angenela lo mjaho. Nyakenye ayengu-356 ayengenele. Siyawanxusa ukuthi abhebhezelise ifulegi lamaphoyisa."
UMasemola uzokhuluma namaphoyisa azoba yingxenye yomjaho kusasa eThekwini.