USOMABHIZINISI osezakhele igama kuleli usephinde waklonyeliswa ngamagalelo akhe kwezamabhizinisi. UDkt Judy Dlamini uqwaqwade emakhanda bonke osomabhizinisi kwiBlack Business Quarterly (BBQ) Awards, okuwumcimbi wokuhlonipha osomabhizinisi abamnyama. Umcimbi ubuse-Emperor’s Palace ngoLwesihlanu, wavulwa uNgqongqoshe wezaMandla uDkt Jeff Radebe.
UDkt Dlamini uklonyeliswe emunxeni wePlatinum Award okuyiwona omkhulu kulo mcimbi. Uphinde wahlabana koweComair Outstanding Woman in Business Award. UDkt Dlamini unguSihlalo onguMsunguli weMbekani Group futhi ungumbhali wezincwadi. Umcimbi wasungulwa ngo-2002. Ubuhanjelwe osaziwayo nosopolitiki. USomizi Mhlongo ongumdansi nongumsakazi weMetro FM, ubephethe uhlelo.
URadebe uthe:“Ushintsho luyadingeka kunoma imuphi umkhakha ngisho kwezamabhizinisi. Ushitsho kwezomnotho kuleli lungenza omkhulu umehluko, luvule namathuba amaningi.”
URadebe uhalalisele abangu-15 abaklonyeliswe eminxeni ehlukene. Naba abanye abaklonyelisiwe.
*Hennessy XO Businessman of the Year Award. Kuhlabane uMnuz Sthembiso Elton Nkomo oyiSikhulu saBalandi Risk Management. *The Innovation Hub New and Innovative Business Award. Lapha kuklonyeliswe i- AET Africa yemikhiqizo yezokuhlanza neyamandla.
*Emperors Palace Community Builder of the Year Award. Itholwe uMnuz Emmanel Bonoko ongumsunguli we-EBonoko Holdings ayiqala eneminyaka engu-21 ukusiza intsha.
*Dormehl Phalane Property Group Transformation Champion of the Year Award. Kuthathe i-ICT-Works esishintshe impilo yabaningi kwezobuchwepheshe.
*Best Employer of the Year Award. Kuhlabane iMaredi Technologies CC ephethwe abamnyama kuzo zonke izigaba.
*Trade & Investment KZN Young Business Achiever Award. UMnuz Pravashen Naidoo oyiSikhulu esiphezulu seWaste Africa nguye ohlabane kulo munxa. Waqala ibhizinisi leRecycling eneminyaka engu-30.
*Bentley South Africa Public Sector Visionary Award. UDkt Ayanda Vilakazi onguMphathi weLama Marketing and Advertising.
*BET New Entrepreneur Award, kuhlabane uNksz Thobile Nyawo onguMqondisi weNyawo Civil construction. UNksz Nyawo oneminyaka engu-19 wasungula inkampani yezokwakha ngo-2015.
*CSI Ubuntu Award, kuwine iVukani-Ubuntu Community Development Projects.
*NHBRC Iqhawe Mentorship Award itholwe uMnuz Musa Zulu oyiCreative Director yeValhalla Arts futhi ongumbhali wezincwadi oyisishoshovu sabalwela abakhubazekile.
*NYDA Outstanding Young Entrepreneur of the Year Award ithathe nguMnuz Muhammad Simjee we- A2D24 egxile kwezobuchwepheshe.
*Nedbank Group Individual Transformation in Leadership Award, ithathwe uNksz Karen Rademeyer onguMxhumanisi weGo for Gold.