OWAYEYINHLOLI nomngani omkhulu yowayenguMengameli wezwe, uMnuz Jacob Zuma, uzinikele esiteshini samaphoyisa saseThekwini, iDurban Central, namhlanje ntambama.
Ithimba labezindaba zethelevishini lakwaSABC lizibonele ngawalo uMnuz Thulani Dlomo ehambisana nommeli wakhe, uMnuz Philani Shangase, beyongena esiteshini samaphoyisa. Ngokusho kwabakwaSABC uDlomo, owake waba yiNxusa lakuleli eJapan, uthathe isinqumo sokuzihambisa yena emuva kwezinsolo zokuthi ungomunye wobhongoza bezibhelu zaKwaZulu-Natal ezidlule nemiphefumulo ebalelwa ku95. Kuthiwa ubefuna ukuzitholela ngokwakhe ukuthi kungathi ekhonjwa ngenjumbane kule nhlekelele eshiye amabhizinisi amaningi ecekeleke phansi kulesi sifundazwe naseGauteng. Kwenzeka lokhu nje ngoLwesine onguNgqongqoshe eHhovisi likaMengameli osabambile, uKhumbudzo Ntshavheni udalule ukuthi omunye kwabangu-12 abasolwa ngokuphehla udweshu useboshiwe. Uthe amaphoyisa asezithendeni zozakwabo abangu-11. NoMengameli wezwe uMnuz Cyril Ramaphosa ukugcizelele, ngesikhathi ezohlola umonakalo eKZN, ukuthi amaphoyisa ahubha bonke ebebesekhaleni lomkhankaso wokutashwa kwezimpahla nokushiswa kwezitolo, okuyizigameko ezenzeke kuleli sonto.