OwaseFilidi uzojoyina iScandal!

IGCAGCELE esokeni entokazini yasesigodini saseSankotsheni, eVryheid, uMonica Thuli Zulu, ngokuqashwa emdlalweni osakazwa ku-e.tv, iScandal! Isolezwe lithole ukuthi uThuli angase abonakale ngesonto elizayo.

Ebuzwa uThuli ngendawo ayilingisayo, uthe unguMaMqadi ongunina kaNhloso osefuna ukushadelwa wumfazi wesibili. "Ngizobe ngizoxazulula izinkinga," eshaya ngezinqamulelayo uThuli. Abanye abalingisi balo mdlalo abasha ngoBongani Madondo ozobe elingisa indawo kamalume kaMaDlomo onamakhosikazi amahlanu noPinky Ntshangase ozobe edlala indawo kaNdlunkulu kaDinangwe kwiScandal! UPinky uzokhunjulwa ngendawo kaMaZungu Maphalala kuMkhokha: The Curse nangokuba wunina wengane kaNkunzi kuZalo. UBongani udlale emidlalweni eminingi okubalwa kuyo iSkeem Saam noZalo.

UThuli uqale ukwaziwa ngendawo kaLizzie emdlalweni owawusakazwa kuSABC 1 osihloko sithi Mina Nawe. Ubuye walingisa indawo kaMaCele kwiDurban Gen, ekaCelina kwiLingashoni, ekaMaMkhize kwiSitha, ekaMama Joyce kuZalo. Ngo-2021 uThuli wake wahlabana ngomklomelo weBest Actress kumaMlwazet Bavundulule Awards ngokulingisa indawo kaCelina kwiLingashoni.