OKlebe bashaqe abaholi bakamasipala besemhlanganweni
OKlebe bashaqe abaholi bomasipala osenhla neKwaZulu-Natal Isithombe: Sigciniwe
Bashaqwe oKlebe besemhlanganweni wesigungu esiphezulu ngoLwesihlanu abaholi bakamasipala waKwaNongoma okuthiwa basolwa ngenkohlakalo ethinta amathenda.
Kuvelwa ukuthi kushaqwe imeya eyilungu leNFP, iphini layo le-EFF nosomlomo we-ANC.
La baholi amagama abo angeke adalulwe ngenxa yokuthi abakaveli enkantolo, baphenyelwa izenzo zenkohlakalo.
Kuthiwa basolwa ngokugwazelwa inkampani eyathola ithenda emkhandlwini.
Umasipala okuboshwe kuwo lezikhulu uphethwe ngokubambisana iNFP, ANC ne-EFF.
Akucaci ukuthi labaholi bathathelwe ukuyohlonywa ngemibuzo noma bazothweswa amacala ngokusemthethweni.
Okhulumela oKlebe KwaZulu-Natal, uLieutenant Colonel Simphiwe Mhlongo, uthe ubengakezwa ngokushaqwa kwalezi zikhulu.
Umthombo obuKwaNongoma uthe abantu bebemi izixongololo ngaphandle kwamagceke omkhandlu behleba ngayo le ndaba yokuthathwa kwezikhulu.