Luya enkantolo olokubola nokubhucuka kwesidumbu somfundi
UMUFI uWandile Ngcobo waseMlaza, isidumbu sakhe okuthiwa sakhishwa sesonakele emakhazeni kahulumeni. Uyise uya enkantolo uyobopha umnyango wezeMpilo
Image: Sithunyelwe
LUYA enkantolo olokubola kwesidumbu somfundi waseDurban Girls Secondary uWandile Ngcobo, okusolakala ukuthi wadlwengulwa wabulawa ekubo ngonyaka odlule.
Umufi owayefunda uGrade 11, kuvela ukuthi wahlaselwa ngabesilisa abangaziwa esele yedwa kubo kwa-D eMlaza eningizimu yeTheku bamenzakalisa.
Kunezimpawu zokuthi waqale wadlwengulwa ngaphambi kokuba abulawe.
Ngemuva kwezinyanga ezimbalwa abasolwa ababili okunguMnuz Sifundo Bhengu (39) ongummangalelwa wokuqala noMnuz Bongani Jili (25) ongummangalelwa wesibili bakhalelwa ngamasongo kaSigonyela.
Laba ababili muva nje basanda kuchakidana bodwa umsolwa wesibili ekhomba owokuqala ngenjumbane ethi uyena owabulala umufi.
Ngemuva kokubulawa kukamufi uyise, uMnuz Mondli Ngcobo, wahambisa isidumbu emakhazeni kahulumeni asePark Rynie.
Uthe wethuka koma nasozwaneni efica isidumbu somntwana sesonakele.
Uthe akazange azithole izimpendulo ezicacile uma ebuza kwabamakhaza ukuthi kwenzekani ngempela. Uqhube wathi wabe esesikhipha isidumbu esesiyisa emakhazeni aseCebolethu.
Uveze ukuthi ngenxa yokungazitholi izimpendulo ezicacile, ubone kungcono ukuba lolu daba aludlulisele enkantolo.
"Sesiyotholana enkantolo noMnyango wezeMpilo waKwaZulu Natal. Kwangisiza kakhulu ukuthi ngithi asivulwe isidumbu ngesikhathi ngiyosilanda ukuze ngibone ukuthi sesonakele. Ukube angikwenzanga lokho njengoba abamakhaza kahulumeni babenqaba ukusivula, ngabe angazanga,'' usho kanje.
Isolezwe liwabonile amaphepha aveza ukuthi uMnyango wezeMpilo esifundazweni sewufakwe enkantolo.UNgcobo namanje uyakhala ngoMnyango wezeMpilo athi ukholwa wukuthi wamhlizela ezibini. Uthi ukholwa wukuthi uzobuthola ubulungiswa njengoba leli cala seliya enkantolo nje.
AboMnyango wezeMpilo KwaZulu-Natal bathe ngeke baphawule ngoba udaba lusezithebenij zenkantolo. .