OHOLA ithimba elijutshwe ukuba lixazulule umbango wesihlalo sobukhosi bukaZulu, uMnuz Willies Mchunu, uthi okwamanje isekwangqingetshe imizamo yabo yokuxazulula lo mdonsiswano.
Lokhu kungenxa yokuthi amalungu asendlunkulu awakavumelani ngendawo okufanele kubanjwe kuyo umhlangano ozohanjelwa yizo zonke izindlu zasendlunkulu.
UMchunu uxwayise ngokuthi uma amalungu asendlunkulu engagcina ehlulekile ukuvumelana ngendawo okuzobanjelwa kuyo lo mhlangano kungasho ukufinyelela esiphethweni kwemizamo yabo yokuxazulula lolu daba.
UMchunu ukusho lokhu ngesikhathi exoxa neSolezwe izolo.
UMchunu, obengundunankulu waKwaZulu-Natal, uhola ithimba labayisithupha abajutshwe ukuba baxazulule lo mbango.
Leli thimba lajutshwa uNgqongqoshe wezokuBusa ngokuBambisana neziNdaba zoMdabu, uDkt Nkosazana Dlamini Zuma.
UDkt Dlamini Zuma wajutshwa umengameli uMnuz Cyril Ramaphosa, ukuba angenele kulolu daba kulandela ukubhuntsha kwemizamo kahulumeni waKwaZulu-Natal yokuxazulula lo mdonsiswano.
Indlunkulu ihlukene phakathi ngokufanele angene ezihlangwini zeSilo uGoodwill Zwelithini kaBhekuzulu, okhothame ngoMashi kulo nyaka.
Kukhona abahambisana nokuqokwa kweSilo uMisuzulu kaZwelithini, igama lakhe elaphakanyiswa incwadi yefa eyashiywa INdlovukazi eyayibambe ubukhosi, uShiyiwe Mantfombi Dlamini Zulu.
Amanye amalungu asendlunkulu afuna ukuba kungene UMntwana uSimakade Zulu kulesi sihlalo.
Ngesonto eledlule ithimba eliholwa uMchunu lihlangane nabahambisana nokuqokwa kweSilo.
Leli thimba lafika lacela ukuba kube nomhlangano ozohanjelwa yiwo wonke amalungu asendlunkulu, ozoba sendaweni ephakathi nendawo ngenxa yokuthi abaphikisana nokuqokwa kweSilo bamanqika ukuba umhlangano ube sesigodlweni kwaKhangelamankengane.
Ithimba latshelwa ukuthi lesi sinqumo ngeke sithathwe ngaphandle kokuthi kuxoxwe neSilo, esasingekho emhlanganweni wangesonto elidlule.
Izolo uMchunu uthe bekungakavunyelwana ngokuthi umhlangano uzokuba kuphi.
"Njengamanje sikwangqingetshe, abakavumelani ngendawo abazohlangana kuyona. Uma bengagcina bengavumelani lokho kungasho ukuphela kwempilo yokulamula kwethu."
UMchunu uthe yize izingxoxo zisekwangqingetshe, kepha bona bayaqhubeka nomsebenzi.
"Siyaqhubeka nokuhlangana nabanye abathintekayo kulolu daba."
UMchunu uthe noma ungagcina ubhuntshile umhlangano wawo wonke amalungu asendlunkulu bona bazowuhambisa umbiko kuDkt Dlamini Zuma.
"Siyoqhubeka sethule umbiko ngokushiwo omunye nomunye. Sekuyokuba kumengameli nakungqongqoshe ukuthi balumisa kanjani lolu daba. Mhlawumbe bangakwazi ukuthatha isinqumo ngoba imininingwane izobe ikhona."