Libaklelise kanje abasakazi iphupho lami

SIZWE BLOSE

KUNECULO elike laculwa yiMpangele ekhal’igijima uSteve Kekane elalithi, nanti iphupho engiliphuphe izolo. Nami ngike ngaba nephupho ngokukleliswa kwabasakazi emisakazweni esingathi mikhulu ezwakala esifundazweni i-KZN nakwezinye izindawo.

Kuleli phupho lami ngiqale ngokuhalalisela uKhozi FM ngempumelelo yalo kumaMTN Radio Awards. Ngilizwile nephuzu likaZandile Tembe ongumphathi wezinhlelo, uma ethi sekuthanda ukuba nzima kule mboni kwazise ngonyaka odlule lo msakazo wathatha izindondo ezingu-9 kodwa kulo nyaka umuke nezingu-6 okuyinto engeyimbi kangako. Cha, ngabe senza iphutha uma singawuhalaliseli lo msakazo. Ngokwezibalo zabalaleli uma sibheka ezinhlelweni eziqala ngo-6 ekuseni ziphele ngo-6 ntambama kulo msakazo, olukaMroza Buthelezi, i Nethezeka noKhozi FM yilona olunesibalo esincane sabalaleli.

Kodwa ngiyazi abantu abaningi bafuna ukwazi ukuthi iphupho lami libaklelise kanjani abasakazi boKhozi FM. Ngokwaleli phupho uhlelo lwasekuseni kusukela ngo-6.30 kuya ku-9 kumele lusakazwe wuSipho Mbatha abambisane noMroza Buthelezi njengoba benza ngesikhathi kuhlukana unyaka. Ngokwami laba basakazi babambisana kahle kakhulu kanti bangenza umsebenzi omuhle ekuseni. Ngo-9 kuya ku-12 leli phupho liveza ukuthi kungakuhle aqhubeke uDudu Khoza owenza umsebenzi omuhle ohlelweni lwakhe ngoba luthinta wonke umuntu, kuze kufinyelele nakomama basemakhaya, okuyisigaba esaziwa ngamajukujuku.

Ngo-12 kuya ku-3 kuvele ukuthi lolu hlelo kungakuhle lunikwe uLinda Sibiya onabalandeli abaningi ngemuva kukaSbu Buthelezi. Ngicabanga ukuthi uLinda angaluthatha alubeke esicongweni lolu hlelo ngoba vele unenqwaba yabalandeli abazomlandela ngisho noma uKhozi lungamfakaphi. Ngicabanga ukuthi izibalo zinganyuka kanti nabezentengiso bangaku-jabulela ukufaka imikhiqizo yabo lapho kunoLinda khona.

Ngo-3 kuya ku-6 kungakuhle kunikwe uVukani ‘Daddy’ Masinga ithuba ophinde adume ngelikaChilli M. Lo msakazi usechithe isikhathi esiningi eGoli, wazi zonke izindawo zakhona futhi abantu bakhona uyabaqonda nokuxhumana nabo sengathi kulula kuyena. Ngikusho lokhu ngoba uKhozi luke lwaqasha uSbu Leope kwabekwa isizathu sokuthi bafuna kwande isibalo sabalaleli babo kwezinye izindaweni njengaseGoli.

Lo msakazo wagcina usuthatha isinqumo sokuthi kube nohlelo olusakazelwa eGoli ukuze usondele kubalaleli abasezindaweni ezakhele iGoli. USipho Mbatha usakazela eGoli kanti unekhono elimangalisayo kodwa kimina kuyafana nokuthi usakazela eThekwini. Ngicabanga ukuthi uChilli M angenza kahle kakhulu kulolu hlelo.

Iphupho lami aligcinanga kuKhozi FM ngoba liphinde ladlulela ku-6 kuya ku-6 weMetro FM. Ngabe ngiqamba amanga, lo msakazo ukahle kakhulu kodwa kungakuhle uma ungashintsha uhlelo luka-12 kuya ku-3 luka-Amon Mokoena. Iphupho lami lithi iMetro FM ingenza kahle kakhulu uma ithatha lolu hlelo ilunika uPhat Joe, uGlen abuye ekuseni beno- Unathi, u-Azania Mosaka aqhubeke no-9 kuya ku 12, ngeke umthinte uThabo “Tbo Touch” Molefe ohamba yedwa ohlelweni lwantambama.

Iphupho lami libe seliya eMhlanga, lathola iGagasi FM. Ngo-6 kuya ku-9 kungakuhle kuthathe uMzo Gumede bese etholelwa umdidiyeli owazi izinto ezenzekayo ezweni. Akekho ongazi ukuthi u-Alex Mthiyane unswempu kodwa uma engase enze uhlelo lwezindaba kusukela ngo-6 kuya ku-7 angaba nswempu kakhulu. I-KZN imdinga kakhulu kulolu hlelo kwazise nokhetho seluseMome. Kodwa singiphoxile isenzo saleli thimba elibizwa nge-Alex & the Crew sokudingida udaba oselusezithebeni zenkantolo. Lokhu uyakuthola uma wenza izifundo zobuntatheli. Ngo-9 kuya ku-12 angiyiboni inkinga ngoZookey Vutela, angaqhubeka nalolu hlelo engimbona elubambe kahle. Uhlelo lukaMzokoloko, kuvele ukuthi uLekomotion ongalwenza kangcono.

Ayikho into engiphathe kabi njengokuthi ngiphaphame, ngingakaboni ukuthi olwantambama lubuyela kuThandolwethu noTP noma cha. Bekuyiphupho nje, kodwa angiyincome neMetro FM ngokususa u-Eddie Zondi ifake u-Ismael Ibrahim. Eminye imisakazo iyesaba ukuzama into entsha kanti engikwaziyo wukuthi ushintsho yinto ongeke wakwazi ukuyigwema.

Ungaxhumana nathi ku- [email protected]